Aruba ta yenando di buraco tur caminda, vooral awa ta yobe pero tin algun di nan, manera esun di e potret cu tin basta tempo caba sin cu habitantenan di Tanki Flip por mira ki dia e caminda aki lo por ser drecha.
Riba e potret ta ilustra un di e entradanan di Tanki Flip, unda un busto di Betico por ser aprecia dilanti dje, un pida di caminda yen di buraconan unda tur dia chauffeurnan mester tin un lucha pa por pasa cu nan auto den parti aki, e ta yena cu awa ora ta yobe y ta bira pio y ademas e buraconan cu tin basta tempo caba ta dorna e luga cu autonan te hasta tin cu bira un auto di off road pa por atravesa e pida aki.
Un yamada ta ser haci na autoridadnan concerni pa cuminsa tuma accion riba varios caminda cu pa basta tempo ta den un situacion deplorabel manera esaki na Tanki Flip, sinembargo, ciudadanonan tambe por meld y/of haci denuncia pa loke ta trata camindanan na mal estado unda por subi riba e website www.dow.aw eynan tin un formulario cu ciudadano por yena y indica unda tin mas problema di asfalt, di camindanan entre otro.
Na momento cu DOW ta ricibi esaki, nan ta haci un evaluacion pa pon’e den un score y na cierto momento tur denuncia of keho ta wordo poni hunto pa na base di esey tuma e decision di cua di nan tin mas prioridad cu otro.
