St. Regis Hotel and Residences na Palm Beach por poco construi riba santo di lama, pero asina mes e construccion ta riba su tereno. Pero e no ta kita afo cu pa usuarionan, particularmente durante e construccion tin problema cu henter e desaroyo. Particularmente hendenan cu ta haci uso di e ‘walkway’ cu ta entre lama y e hotelnan na Palm Beach awor ta obstrui pa e construccion y si mira, literalmente e hotel ta pega cu caminda di peaton.
Riba rednan social, hopi usuario a critica no solamente cu e hotel ta grandi y ta crea yen di otro problema pa Aruba, tambe a keha cu ta kita accesibilidad pa e caminda di peaton.
Y locual hopi tin miedo ta cu eventualmente, St. Regis of lo kita e kwihinan grandi of ta inclui nan den su propiedad, kibrando asina e tradicion di hopi decada, unda famianan ta reuni bao di e matanan ey, pa pasa dia na lama.
A puntra dos pareha turista kico ta nan pensamento y nan ta considera e construccion mas bien un ‘nuisance,’ un molester, pero no a expresa mucho mas. E kehonan ta mas bien di personanan local.
Locual Bon Dia Aruba a compronde cu ta e caminda pa peaton tabata incorectamente traha y cu a pasa riba terenonan cu en realidad ta cay den e tereno di hotelnan. Di otro banda, hopi hotel tambe a tuma tereno publico, esta e beach pa pone nan palapanan. Pregunta ta si St. Regis lo haci mescos y cuanto espacio ta bay keda pa localnan por sigui bishita e lama y e beach. “Berdad nos tin acceso liber na e beach. Pero ya caba a bira un custumber cu trahadonan di e hotelnan ta bin purba core cu nos, ta zundra nos. Cierto momento e no ta nada agradabel pa keda,” Marcel Nahr, kende a manda Bon Dia Aruba e potretnan, a bisa.
“Mester tende zundramento, hasta ora ta trece nos mesun stoelnan.” Hopi a expresa e mesun sentimento y e pregunta cu a domina ta pakico mester a traha e hotel asina cerca di beach, cu ya caba ta bao hopi presion.
St. Regis Hotel and Residence a bin na luga di e proyecto di expansion di Westin Hotels. E tereno tabata destina pa un hotel y residencia y tabata bao maneho di Minister Otmar Oduber cu a otorga e opcion na e grupo Desarollos Hotelco, cu ya caba tin Ritz-Carlton Aruba.
