Redaccion di Bon Dia a ricibi varios yamada cu keho di e caminda di Havenstraat cu ‘atrobe ta den mal estado’. Den pasado Bon Dia Aruba tabata e prome pa trece esaki dilanti y despues di puntra varios biaha riba ken ta responsabel pa drecha esaki, e caminda a wordo drecha.
Ya caba na juli 2017 e caminda aki tabata den un estado deplorabel. E tempo ey despues di a haci yamada na DOW pa puntra ken ta responsabel, si ta DOW of e contratista cu a haci esaki, DOW a nenga di duna informacion. E pregunta aki nunca a keda contesta pero DOW a tuma e responsabilidad di fix esaki. Na luna di october 2017, finalmente director di DOW Marlon Croes a duna di conoce cu e caminda tin nan atencion.
E tempo ey sr. Croes a splica cu nan mester bay coba e area pa a base di esey determina kico ta e problema den e subsuelo. Pues pa wak si lo tin un lekmento di awa cu ta core y muha e fundeshi cu e ta bira menos stabiel. Tambe mester a wak si e ta un rioolering of tuberia di WEB cu por ta e problema pa asina por drecha esaki di biaha.
Segun e splicacion cu Bon Dia a ricibi di e director di DOW, ora caba di traha riba e fundeshi, DOW lo haci stabilisacion cu santo cual ta un mescla di santo cu cement y no lo wordo afecta pa awa y garantisa cu e calidad di e caretera ta bay mas largo. E director a declara na Bon Dia cu ‘tin un discusion interno andando si nos tin cu kita e paversnan anto asfalta e caminda completo, of bay na mantene e plan manera cu e ta aworaki’. E pavers ta un parti di diseño cu intencion pa conecta e plasa panort di Renaissance Hotel cu e plasa Daniel Leo por medio di diseñonan pa tene nan hunto visualmente.
Protocol
Den luna di november 2017, a cera e caminda di Havenstraat pa algun dia pa realisa e trabounan necesario. Riba dia di ‘Black Friday’, e minister encarga cu infrastructura, Otmar Oduber (POR), a anuncia cu e caminda lo ta cla pa wordo habri y alabes a splica di e maneho nobo cu lo wordo hiba pa DOW.
E idea tras di e maneho tabata pa kita peso riba trafico y comercio ora proyecto ta wordo ehecuta of ora di mantencion. E maneho nobo lo hacie posibel pa trabounan tuma luga den oranan di anochi. E mandatario a splica cu despues di a sinta hunto cu DOW nan a bin na un conclusion pa ehecuta mas cu ta posibel proyectonan den area comercial manera caya grandi den parti anochi.
“Restauracionnan cu tambe mester tuma luga lo wordo haci den oranan di anochi of madruga. Mi ta kere e ta un condicion mas fresco pe trahado y e ta un ambiente mas faborabel”, tabata palabranan di e minister.
Locual nos redaccion a tuma nota di dje ta cu varios caminda ainda ta trahando den dia y treciendo asina aki molester pa trafico en general. Como medio di comunicacion investigativo, nos a purba na varios biaha pa tuma contacto cu e minister concerni como tambe e director di DOW pa haci pregunta riba e protocol y tambe pa aclaria ken su responsabilidad e ta pa e caminda di Havenstraat. Te na e momento aki, niun di dos no a duna oido na nos yamada. Tambe nos ta buscando contesta concreto di e status di edificio di ex JFK school, cu segun informacion cu nos tin, a wordo traspasa pa converti esaki den hotel, contrario na su destinacion original. Nos ta keda pendiente di un entrevista cu e mandatario.
