Diasabra 13 di april pa 5or di atardi comunidad di Aruba ta bay haya e oportunidad di participa den un caminata silencioso denomina “Walk of Light” un actividad positivo organisa pa varios fundacion cu ta rescata bestianan y tambe ta dedica na e cacho Khaleesi specialmente.

Pa esaki, Bon Dia Aruba a tuma contacto cu Zoey Conijn Berkel di Luna Foundation Aruba Inc caminda el a splica cu esaki ta un actividad pa hende no lubida loke a pasa recientemente cu e cacho di nomber “Khaleesi” cu a muri pa via di maltrato y abuso, loke otro cachonan a pasa prome cune y cu tambe ta continua sucediendo cu otro cachonan rond Aruba incluso despues di Khaleesi su morto te ora ley lo cambia.

“Den memoria di dje nos ta haciendo e caminata, pa uni nos pueblo back,” Zoey a sigura.

Menasa y agresion a bay mucho leu
 Igualmente el a trece dilanti e agresividad y menasanan cu tin riba rednan social contra Alberto Groeneveldt ken ta e doño di Khaleesi no ta bon, Zoey a señala cu e caminata ta pa calma pueblo y por enfoca directamente riba loke ta pasando “tin maltrato riba nos isla, loke a pasa cu Khaleesi no ta un caso solamente, esaki ta tumando luga pa añanan caba, solamente cu loke a sucede cune a bay viral y haya extra atencion.”

Den su opinion, loke hendenan ta bin haciendo riba rednan social contra Groeneveldt ta bayendo mucho leu, “loke el a haci ta fout, e cos cune ta cu si el a sali y bisa cu e ta tuma responsabilidad di loke a pasa, cu el a haci un fout, cu e ta pidi sorry pa esey, cu e lo zorg pa e no pasa mas y splica pueblo ki a bay fout, e no a tuma e responsabilidad ey y esey ta loke mi no ta compronde loke Aruba ta haciendo y no ta solamente na Aruba sino na Merca tambe, un Sra. a post su adres y nos a kitele pasobra esey no ta e intencion, di pone su bida den peliger, nos tin cosnan pio cu ta pasando riba nos isla manera pedofielnan, e persona aki a haci un fout y nos no sa kico ta pasando den su mundo, laga e ley haci nan parti y nan lo faya pasobra tin cu cambia e ley, pero si e ta haya servicio comunitario tambe ta bon, pero pa desea e persona aki su morto of tur e cosnan cu ta bis’e na dje, no, esey no ta loke nos ta desea.”

Bisti na blanco pa bay caminata
 Pa e motibo aki, otro siman diasabra 13 di april for di 5or di atardi te cu 8or di anochi e caminata ta bay cuminsa na Brandweer band’i aeropuerto y ta caba na Governor’s Bay Beach, e intencion ta pa esnan cu kier participa por bay bisti di blanco y tambe por hiba borchi, bandera, luz of bela, no ta permiti pa bay cu blaas pa motibo di cuida medio ambiente.

Ademas, Zoey a sigura cu esaki ta un caminata silencioso y no ta un caminata pa bestia tampoco “si cacho ta comporta su mes, sin blafmento y si e ta cana rustig mag di bay cune, de lo contrario no, pasobra e idea ta pa hendenan compronde kico a bay fout cu Khaleesi y pa esey no lo pasa atrobe.”

El a conta cu debi na loke a sucede, nan ta hayando mas yamada y mas mensahenan di casonan di maltrato “hopi mas, awor e hende sa kico por pasa cu un cacho cu ta na cadena cortico, si nan ta mira cu e bisiña tin un cacho cu no ta hayando cuminda, etc., ta cosnan cu ya caba tabata pasando pero awor cu a wordo confronta cu loke a pasa cu Khaleesi, awor nan ta realisa cu tin cu reporte pa e no yega mesun leu cu e caso di Khaleesi,” el a bisa.

Esaki ta nifica cu e caso aki ta treciendo dilanti mas conscientisacion di e comunidad “y esey ta mustra mi cu Khaleesi no a muri en vano, toch su morto a haci algo, el a habri wowo no di tur hende, pero toch el a lanta hende fo’i soño pa nan cuminsa tira un bista di loke ta pasando akinan,” el a menciona.

Cambio di ley di cacho na caminda
 Zoey a comenta cu nan a papia cu e oficina di minister encarga cu e parti aki, Ursell Arends, caminda nan ta bezig pa cambia e ley, pa motibo cu e ley na e momentonan aki ta indica cu si un persona ta mata e cacho di otro hende ta castigabel, pero si un persona ta mata su mesun cacho ta castigabel pero cu menos peso di ley, “pa mi, maltrato ta maltrato, si ta a mi of otro hende su cacho e straf mester t’ey y eynan nan kier cambia e ley, nan a bisa mi cu nan ta purbando pa cambiele na un manera cu normalmente ta dura un aña of dos aña pa cambie y nan ta purbando pushele pa wordo cambia na fin di december, pasobra loke a pasa awor, ta sucede casi tur dia,” el a comenta.

Tocante e ley nobo, Zoey a señala cu ley di cacho den cura, ta cerando e cachonan den e cura, pero ni un hende ta controlando e cura “p’esey a bin cu e ley aki pero e mester bin cu algo su tras pa controla, pasobra si bo tin bo cacho den cura, bo mester zorg cu e ta bon cuida si, eynan tambe bo ta kibrando e ley y bo ta fayando, pa e motibo ey pa december y januari nan ta spera cu e ley ta cambia pa proteha nos mascotanan un tiki miho.”

Mas empatia, educacion y conscientisacion
 Tambe e ta enfatisa cu loke ta haci mas falta den comunidad ta mas educacion, empatia, mas conscientisacion y mas amor propio tambe “pasobra si bo ta stima bo mes, con bo ta bay zorg pa bo mascotanan y bo yiunan? Pasobra no tin maltrato di bestia so, nos tin maltrato di mucha cu tambe tin cifranan basta halto, salud mental cu mester mas ayudo pa hendenan por bay papia riba loke nan ta pasando, pa tur instancia bin hunto, si un juffrouw ta wak algo cu ta pasa na scol pa nan por haci algo, mesun cos cu bestia, si un veterinario wak cu un hende a drenta cu un caso manera esun di Khalessi, pasobra Khaleesi no ta e prome cacho cu e doño a pone cadena rond di su nek anto el a haciele daño, tambe tin otro caso cu otro cacho igual, veterinario mester por yama un caminda y splica loke a pasa, pa reporta esey y follow up, e mester ta un tiki miho coordina pa nos tur traha cu otro,” Zoey a declara.

El a splica tambe cu su fundacion ta e prome cu ta entrega carta pa e casonan asina aki, si nan ta ripara cu e situacion no a cambia e ora ey mester forma un ekipo cu Bureau City Inspector y e ora ey por haci un follow up riba e cas y duna e doñonan un multa of servicio comunitario.

Pa finalisa, el a expresa cu “maltrato no ta nos cultura, pero manera e ta bayendo awor nos ta mustrando e mundo esey, pasobra pa e caso di Khaleesi nos tin hopi wowo riba nos isla, nos ta mustrando e mundo cu maltrato si ta parti di nos cultura pasobra nos no ta haciendo nada pa stop e y esey no ta cu nos animalnan so, si bo no stima bo mes, bo no por stima otro y si bo tin mental issues bo tin cu busca ayudo y no maltrata bo bestia ni bo yiunan tampoco.”

Pa personanan interesa di haya un T-shirt y un sticker por comunica na e number cu ta indica den flyer; 5946689.