Pa dia 28 di mei, Delo Maduro, hunto cu su team, ta organisa un caminata pa conscientisa riba e malesa Multiple Sclerosis (MS) y tambe pa haci un recaudacion di fondo pa un tratamento cu e mester sigui den exterior.

Den un conferencia di prensa a informa cu e caminata aki ta tuma luga dia 28 di mei y ta bay sali for di Costa Linda te na Phoenix y bolbe, lo cual ta un total di 5 KM.

Dia Internacional di Multiple Sclerosis ta 30 di mei y e aña aki e tema ta ‘Connecting.’ P’esey ta invita tur esnan cu kier participa y coopera cu Delo Maduro pa participa y ademas nan ta pidi pa bisti cu un paña color oraño, sea pa cana, pa participa cu bicicleta, rolschaats of den rolschoel. Si algun persona kier cana cu su cacho, tambe ta bonbini; importante ta pa conecta cu otro y siña mas di MS.

Delo Maduro ta un docente pa 23 aña caba y e ta hopi afecta emocionalmente pa e hecho cu e no por practica su profesion debi na efectonan secundario di e malesa MS. E ta hopi limita den su trabou pa cual aworaki e ta traha solamente como un invaller. Su deseo ta pa mehora su calidad di bida pa asina e por dedica hopi mas aña na e muchanan di Aruba, ya cu e ta docente di Kleuterschool.

El a conta cu el a wordo diagnostica cu e malesa aki cuatro aña pasa ora cu el a bay Colombia pa un dolor agudo. Den e scan di MRI haci a descubri manchanan den su wes’i lomba y cu a resulta di MS.

Tambe el a sigura cu su ruman homber, Enzo tambe a haya e malesa aki cu su 20 y pico di aña, pero lamentablemente a tarda hopi pa yega na e diagnostico y a cuminsa cu un tratamento despues cu e malesa a afect’e basta caba.

MS ta un malesa cu mester tuma un hangua tur siman, pero awendia mayoria di e pashentnan ta tuma un pildo. Tambe a bisa cu no tin cura ainda pa e malesa aki y cu mas trempan ta diagnostica MS, mas miho pa pashent.

Na Aruba tin 30 persona registra cu e malesa aki, cual ta yama e malesa di mil cara, debi cu tin diferente tipo di MS y cerca algun pashent e ta visibel y cerca otronan no. Den e caso di e dos rumannan Maduro, cada uno a hay’e diferente. E prome a tarda pa haya un diagnostico y den caso di Maduro a haya un diagnostico di MS hopi lihe. Maske pa e malesa mes no tin cura, si tin tratamento pa mehora calidad di bida.

Pa e motibo aki y pa por logra e meta di mehora su calidad di bida, e tin mester di un tratamento pa vertigo cu el a haya cu ta esun mas extremo den cada atake cu el a sufri. Den esaki a splica cu a haci investigacion y a haya sa cu na Merca tin un clinica specialisa cu por yuda persona cu e vertigo extremo por mehora pa un 95%.

Sinembargo esaki ta algo cu AZV no ta cubri y p’esey ta organisando e caminata pa recauda suficiente fondo pa cubri e tratamento intensivo di un siman largo, di mainta te atardi, na Merca.

E gastonan di pasashi, estadia, transporte y alimento ta cubri pa Maduro mes y su famia y tur loke ta bay recauda ta bay exclusivamente pa e tratamento, pa cual e citanan ta acorda caba pa luna di juli.

Cu esaki, nan ta invita tur organisacion of negoshi pa encurasha nan trahadonan pa participa den e evento aki, cu un participacion cu ta costa solamente 10 florin.

E dia di e caminata, ta cuminsa registra pa 7’or di mainta na Costa Linda. Pa esnan interesa pa cumpra carchi por tuma contacto na e siguiente numbernan: 5625225 – 5619020 – 5657077 of tambe por manda un Whatsapp na e mesun numbernan cu tur dato, si mester di ticket of ta desea di haci un donacion.

Dello Maduro su historia
 Cesar Fidelo Maduro tin 50 aña di edad y ta maestro di scol preparatorio ya pa 23 aña.

Na 2019 el a stop di traha full-time den klas y a bira invaller, esaki pa motibo cu a wordo diagnostica cu Multiple Sclerosis. El a haya un dolor neuropatico na su curpa cu cada bes tabata causa su ausencia na su trabou. Asina mes el a sigui traha cu hopi amor y dedicacion.

Sinembargo na november 2020, despues di 7 luna cu el a haya Covid-19, a surgi un biramento di cabes (vertigo) masha horibel mes, segun el a conta, y ora cu el a recupera, nunca mas e balans a bay back na 100%.

“Cada tanto tempo mi tabata haya atakenan di vertigo. Esakinan tabata converti mi den un persona cu hopi temor y isola di bida social. Mi a busca ayudo cerca diferente dokter. Conclusion di e buscamento di ayudo aki ta, cu no por haci nada aki, y mester siña biba cu esaki y bebe pildonan,” el a conta.

Pa es motibo ey el a cuminsa busca ayudo di exterior y asina el a bin haya sa di un ‘functional neurologist’ na Merca. Esaki ta un doctor cu ta trata diferente problema di e celebro sin haci uso di operacion of remedi.

Buscando mas informacion detaya di e tratamentonan aki, el a logra di haya un consulta cu un doctor di un functional neurology clinic y e dokter a splica Maduro kico tur nan ta trata y e posibilidad ta 95% di su situacion por drecha, y por libr’e di e vertigo aki cu e ta sufriendo di dje pa 2 aña y 5 luna.

E tratamento intensivo cu Maduro ta bay haci, lo dura 5 dia, entre 9or pa 5or di atardi y e gastonan pa e full e tratamento lo costa 10.000 florin.