Un edificio di 7 piso den construccion na e ciudad di Sihanoukville, na Cambodia a cay riba e trahadonan, cu tabata den nan cas mainta trempan. E incidente a cobra bida di shete trahado y heridando 23 persona, segun autoridad a informa.
Den un comunicado, autoridad a bisa cu 4 persona di nacionalidad Chines involucra den construccion a wordo hiba prizon tanten investigacion tuma luga di e suceso. E trahadonan a bisa cu e edificio den construccion tabata sirbi como nan acomodacion, cu nan bibando den e di dos piso.
Nhor Chandeun y su casa tabata drumi ora cu banda di 4or di madruga a tende un zonido fuerte, y e edificio a cay riba nan. “Tur trahado tabata drumi, prome cu el a cay el a cuminsa tembla. Tur cos a pasa demasiado lihe, no a haya chens pa core bay”, Chadeun ta bisa.
Ministerio di trabou y formacion profesional a bisa cu 30 trahado tabata den e luga ora cu e edificio a collapse, pero Nhor Chandeun a bisa cu tabata tin 55 pa 60 persona paden di edificio.
Gobernador Yun Min, di provincia di Preah Sihanouk, a bisa cu edificio tabata propiedad di inversionista Chines cu a cumpra tera pa un condominio. Un di e cantidad di proyecto Chines den un parti di lama.
No ta cla ainda kico a causa cu edificio a cay. Por a wak e team di rescate na escena pa yuda saca hende cu a keda dera. E trahadonan a bisa cu tabata tin 1.000 persona participando den operacion di rescate, y lo continua durante anochi.
Chandeun y su casa a keda trapa durante 12 ora prome cu e team di rescate a haya nan. “Mi casa y ami a sigui pidi pa yudansa. Nos tabata grita pero niun hende tabata contesta. Nos a pensa nos lo muri, pero pa nos suerte, nan a haya nos na tempo”, Chadeun a bisa.
