Fundacion Sinterklaas hunto cu comision di celebracion dia nacional a papia tocante cambio cu lo tin e aña aki den e yegada di Sinterklaas dia 17 di november pa 10or di mainta na Aruba Ports Authority.
Karin Drost, Presidente di e fundacion a comparti cu e biaha aki e yegada di Sinterklaas lo ta diferente, esta cu e figura navideño lo yega na ex container haven, unda cu tin e Harbour Arena. E motibo di cambio ta pasobra APA ta reconstruyendo e waf. Tambe e dia ey lo bay tin dos barco grandi cu lo ta na Aruba.
E porta lo habri pa 9or di mainta, unda cu famianan por yega. Minister di cultura, hunto cu comision y fundacion lo ta presente. Evelyn Frank, Vice Presidente a anuncia tambe pa yega trempan di pa asina por haya luga pa parkeer adecua, debi na construccion y dos barco di trafico turistico. Lo cuminsa e caminata mas lihe for di Wendy’s te cu Royal Plaza. Esey ta un forma di coopera y no ta stroba e turista cu lo disfruta di Aruba cu ta cana rond.
E parti ey so lo cana lihe, despues di yega Royal Plaza e parada lo sigui normal te ora cu yega su destinacion na Plaza Betico Croes y lo ta manera semper cu lo parti mangel y saca potret. Lo tin varios actividad lo tuma luga, manera wega, show y cuminda.
Nan ta invita henter pueblo di Aruba cu tin mucha chikito pa pasa un tempo ameno cu e yegada di Sinterklaas. E caminata lo tin un largura di 7km tambe lo tin cooperacion cu polis pa por yega na tempo stipula.
John Flemming, president di comision celebracion dia nacional a bisa cu ta sostene e actividad hunto cu cooperacion financiero di parti facilidad pa e festival di Sinterklaas y otro cosnan cu e fundacion mester.
“Por bisa ta un placer mirando cu e fundacion a prepara di trempan pa e aña aki un biaha mas por acerca na nos. Nos ta yuda den esaki den nomber di minister di cultura, nos kier gradici nan pa sosten y invita henter pueblo di Aruba”, Flemming a expresa.
