Recientemente minister Dangui Oduber (MEP) a anuncia cambionan na spoedeisende hulp via di muda dokter na warda (huisartsenpost) pa medical office building y ta extende orarionan di servicio.

“Minister Dangui Oduber a comparti un noticia sumamente positivo pa cu cambio na huisartsenpost pa yuda reduci e lista di espera na spoedeisende hulp (SEH)”, segun un comunicado cu Bon Dia Aruba a ricibi.

Segun e comunicado di e minister, actualmente e huisartsenpost (HAP) no ta trahando na un manera eficiente y integral. E distancia fisico entre e HAP y SEH ta stroba e comunicacion. Esaki ta trece cu pashentnan tin momentonan ta warda ‘innecesariamente’ pa oranan largo, prome cu por haci un ‘triage’ y consecuentemente wordo atendi adecuadamente, e comunicado ta sigui bisa.

“Un ehempel ta na momento cu un pashent bay HAP e tin di warda eynan pa dokter wak e y despues si e tin mester di pasa SEH pa bay saca potret of otro test nan e lo mester bolbe warda pa un triage. Un di e kehonan di mas grandi ta e funcionamento di SEH caminda e ora y/of lista di espera ta hopi largo.

Pa evita esaki y pa trece cambio y mehoracion na SEH, e huisartsenpost lo muda fisicamente banda di SEH desde juli 2018 y lo ta situa na e medical office building caminda cu e pashent ta bay acudi su mes directamente na HAP y no na SEH.”

Den casonan di emergencia SEH ta keda e luga indica pa ofrece ayudo necesario. E orario di HAP tambe lo conoce un cambio. Lo bay extende e ora di servicio di HAP te cu 00:30. E orarionan actual di e huisartsenpost ta di 18:30 pa 22:30.

Problemanan soluciona

Actualmente e dokter di cas na HAP no tin contacto direct cu specialistanan na spoedeisende hulp. Via di haci e cambio di muda HAP pa e medical office building banda di SEH, lo kibra e barera di comunicacion aki pa asina por traha mas eficiente.

“Ora y lista di speransa SEH ta largo pa motibo cu hopi hende ta bay SEH cu casonan medico cu no ta di emergencia”, e minister ta bisa den su comunicado.

“Awor akinan tur persona mester pasa HAP prome y consecuentemente si ta necesario un verwijzing lo wordo haci pa bay SEH. Den casonan specifico di emergencia lo pasa di biaha pa SEH.”

Segun e comunicado, e cambio aki tambe lo aporta na e cantidad di personanan cu ta bay SEH y lo reduci e lista di speransa SEH. “Asina ki nos ta haci un stap den mehora nos cuido medico y mehora e servicio medico cu nos ta brinda na comunidad di Aruba.” Cu e cambio nan aki minister Dangui Oduber ‘ta cumpli cu programa di gobernacion caminda e ser humano ta central’, e comunicado ta finalisa.