Presidente di sindicato STA, Diego de Cuba ta haya cu e parti di e reforma fiscal cu a drenta na vigor, specificamente esun cu no ta bay cobra loonbelasting ariba e salario cu ta 2,400 florin bay abou, ta algo di aplaudi.
E ta haya cu e tipo di compensacion aki pa e trahadonan cu ta gana un salario asina, ta un forma pa nan por haya un tiki mas placa den nan cartera. Sinembargo, como sindicato nan ta bay studia tur e concepto cu nan a haya di e reforma aki. Pero presidente di STA ta sigur cu nos gobernantenan ta bay haci esaki hopi habri.
“Nan ta bay laga e porta habri pa discuti cu gremio comercial y prudentemente esaki mester wordo haci tambe”, el a bisa.
E tin cu bisa cu e reforma fiscal aki lo wordo discuti tambe den e Dialogo Tripartite Social-Laboral, pasobra e ta un asunto di suma importancia pa pais Aruba. E sindicalista ta haya cu e ta un intento y un logro bastante grandi di parti di e gobierno pa trata di saca e pais Aruba for di e ‘desaster’ financiero cu nan a bin hay’e aden. E ta un proceso -segun De Cuba- cu no ta wordo logra den cuater aña, sino cu e ta bay tuma mas tempo. “Pasobra e debenan cu a ser laga atras ta astronomico,” el a bisa.
Cambionan cauteloso.
E sindicalista a agrega cu nos mester corda cu comercio ta un parti hopi importante di nos comunidad, y nan ta carga bastante peso caba. P’esey e ta haya cu ‘mester ta hopi cauteloso’ ora cu bo ta bin cu reforma fiscal. Ya cu mester discuti’e di tur banda pa no perhudica e comerciantenan. Pasobra e gastonan por surpasa locual nan por carga den nan operacion.
“Si esaki no ta wordo haci cautelosamente, bo por haya bo den un situacion cu negoshinan ta bay cera,” el a agrega.
Sinembargo sindicalista de Cuba ta spera cu den e sistema nobo cu gobierno ta bay introduciendo den cuadro di e reforma fiscal, tin espacio toch pa e comerciantenan.
