Cambionan den ley di LAft ta promove un maneho financiero responsable

Den nos edicion di ayera, nos a publica un prome articulo na unda ta brinda informacion detaya ariba e cambionan cu ta bay tin den e Landsverordening Aruba Tijdelijk Financieel Toezicht (LAft) cu drenta na vigor dia 1 di januari 2024.

Manera ya caba menciona, Aruba y Hulanda ariba 2 di mei 2015 a yega na un protocol tocante e finanzas publico di Aruba, for di cual a resulta e Ley di Aruba pa Supervision Financiero Temporal (LAft), cu ta contene reglanan relaciona na supervision independiente durante e formacion y ehecucion di e presupuestonan di Pais Aruba y diferente asunto.

Despues di varios luna di negociacionnan intenso, Gobierno di Aruba y Hulanda a yega na un acuerdo pa loke ta trata e supervision financiero cu lo sigui den 2024 cu e ley di LAft. E ley aki di supervision ta vence 31 di december 2023 y Hulanda, na ultimo momento, a presenta tres condicion cu mester wordo inclui den e ley aki pa asina por yega na un acuerdo ariba e tema aki.

Pandemia di COVID-19 a yega Aruba na luna di maart 2020 y a afecta e Pais fuertemente, resultando den un necesidad significante pa sosten di likides for di Hulanda den forma di prestamonan sin interes.

Un proyecto di Ley di Reino pa supervision financiero pa Aruba a keda presenta na Staten-Generaal, conteniendo reglanan pa supervision financiero for di Reino riba Aruba cu normanan presupuestario nobo relaciona na e ley di LAft.

Den e documentonan oficial di Gobierno di Aruba cu ta elabora ariba e cambionan cu tin den e ley di LAft, ta splica cual te a normanan y condicionnan cu ta conoce cambio.

Segun e documento ta sigui splica, cu e evaluacion, menciona den e articulo anterior, ta conta cu e siguiente aspectonan: den e presupuesto y presupuesto plurianual tur gasto y entrada spera ta wordo inclui, incluso e riesgonan relacion na construccion di financiamento fuera di e presupuesto; e entrada y gasto menciona den e presupuesto mester wordo splica claramente.

E presupuesto ta wordo organisa den un manera cu ta satisface e criterionan di orden y verificalbilidad; e gasto- y entradanan cu ta wordo produci den e aña di obligacion, cu excepcion si esaki evidentemente no ta prudente, no tin sentido for di un perspectiva di economia empresarial; y gasto- y entradanan ta wordo separa for di otro.

E documento ta indica cu den e presupuesto, un splicacion mester wordo inclui tocante e condicion financiero di e sector colectivo, cu un resumen di e prestamonan di placa contrata; e naturalesa di e prestamonan di placa, incluyendo e condicionnan di e prestamo, e suma cu ainda mester wordo paga pa cada prestamo.

E decisionnan pa paga e prestamo cu ta scoge pa e aña di presupuesto aki, cambiando entre prestamonan cu a wordo contrata prome cu dia 1 di maart 2020, prestamonan cu a wordo contrata for di 1 di maart 2020 den relacion cu e sosten di likides cu Hulanda a duna, prestamonan cu e Pais a contrata for di 1 di maart 2020 cu otro partidonan y prestamonan cu e Pais a contrata for di e momento di entrada di e articulo aki.

Otro cambionan cu e documento ta señala ta cu si e prestamonan ta wordo contrai riba costo di e Pais den e contexto di un procedura di destaho publico, esaki lo sucede despues di ricibi conseho tocante esaki for di Banco Central di Aruba.

Un parrafo nobo lo wordo agrega na articulo 15 cu ta bisa cu si e manera di ehecucion di un procedura di destaho publico, manera ya caba menciona, ta diferi materialmente for di e conseho di Banco Central di Aruba, esaki lo sucede bao di registracion por escrito di e motibo of motibonan pa diferi for di e conseho.

E documento ta indica tambe cu despues di articulo 18, un articulo nobo lo wordo introduci, cu ta papia tocante e aña financiero 2020 y e añanan financiero cu ta sigui, y mester brinda un declaracion di cuentanan tocante e responsabilidad financiero conforme un sistema financiero pa meta special.

Te ora un declaracion di control di aprobacion di e cuentanan di e aña wordo ricibi, e Minister lo informa e Colegio di Supervision den e prome y di tres rapport di ehecucion, manera ya caba menciona den articulo 19, di e avance di e trayecto di mehoracion di maneho financiero. Den su rapport tocante maneho financiero, e Minister lo duna tambe informacion tocante con e conseho di e Colegio di Supervision su posibel recomendacion ta wordo sigui.

Den articulo 19, den e prome paragraf, ‘di cada kwartaal’ lo wordo cambia pa ‘di prome y di tres kwartaal’.

Despues di articulo 27, un articulo nobo lo wordo introduci, cu lo bisa cu e Pais no ta drenta den ningun compromiso nobo di cooperacion financiero publico-priva.

E ley aki ta drenta na vigor dia 1 di januari 2024. Si e Boletin Oficial di Aruba den cual e ley lo wordo publica, ta sali despues di 1 di januari 2024, e ley ta drenta na vigor e dia despues di e fecha di publicacion di e Boletin Oficial di Aruba den cual e ley lo wordo publica, y e ta traha retroactivamente te cu 1 di januari 2024.

Mientras cu Aruba y Hulanda a logra yega na un acuerdo ariba e cambionan den LAft pa supervision financiero den 2024, pa loke ta trata e RAft, Gobierno demisionario di Hulanda tin un mandato pa sigui negosha cu gobierno di Aruba tocante introduccion di un ley di Reino pa supervision financiero, pa cual no tin un fecha limite determina.

Mientras cu no tin un acuerdo ariba e tereno aki, Aruba lo mester paga e interes di 6,9% riba e prestamonan di 2020. Esaki por bira 5,1% na momento cu tin un acuerdo encuanto e forma y contenido di un ley di Reino. Na momento cu tin un ley di Reino vigente, Aruba lo por haya un interes di 3,2%.

Gobierno Hulandes a expresa su disposicion pa considera e modelo ‘hibrido’ cu Aruba a propone. E modelo ta encera un propuesta di reparti aspectonan di supervision financiero entre un ley di Aruba y un ley di Reino.