Manera ta conoci, recientemente Prome Minister Evelyn Wever-Croes a anuncia cu Aruba y Hulanda a yega na un acuerdo pa e cambionan cu e ley di supervision financiero, LAft ta bay conoce y cu lo drenta na vigor dia 1 di januari 2024. Den e articulo aki, Bon Dia Aruba ta elabora ariba e cambionan cu e ley di LAft lo conoce, segun ta indica den e documento oficial di Gobierno di Aruba.

Aruba y Hulanda ariba 2 di mei 2015 a yega na un protocol tocante e finanzas publico di Aruba, for di cual a resulta e Ley di Aruba pa Supervision Financiero Temporal (LAft), cu ta contene reglanan relaciona na supervision independiente durante e formacion y ehecucion di e presupuestonan di Pais Aruba y diferente asunto.

Cu Articulo 14, e LAft ta contene e marco di norma pa evaluacion di e presupuestonan y dato di ehecucion di e ministerionan y di e otro parti di e sector colectivo di Aruba, cu den e di dos paragraf ta contene normanan pa deficit y surplus pa e añanan presupuestario 2015 te cu 2018.

Aruba y Hulanda mediante e Protocol di 22 di november 2018, cu ta contene e formacion di e rumbo pa finanzas gubernamental di Aruba ta solido, transparente y sostenibel, a yega na e acuerdo tocante normanan pa deficit y surplus pa e añanan presupuestario 2019, 2020 y 2021, y a yena cu acuerdonan nobo relaciona na reduccion di e proporcion di debe, disminucion nominal di gasto di personal, uso di resultadonan positivo y maneho di reglanan di compensacion.

Pandemia di COVID-19 a yega Aruba na luna di maart 2020 y a afecta fuertemente e Pais, resultando den un necesidad significante pa sosten di likides for di Hulanda den forma di prestamonan sin interes.

Un proyecto di Ley di Reino pa supervision financiero pa Aruba a keda presenta na Staten-Generaal, conteniendo reglanan pa supervision financiero for di Reino riba Aruba cu normanan presupuestario nobo relaciona na e Ley di LAft.

Segun e documento ta sigui indica, pa motibo di bon gobernacion y e necesidad resultante pa observacion di e derecho parlamentario di presupuesto, y tambe den espera di un posible fihacion nobo y structural di e supervision independiente durante e formacion y ehecucion di e presupuestonan di e Pais y asuntonan relaciona, ta desea pa incorpora di antemano den e ley di LAft e normanan presupuestario di e proyecto di Ley di Reino pa supervision financiero di Aruba, y algun asuntonan relaciona cu esaki.

Teniendo na cuenta e conseho di Raad van Advies, cu consulta comun di Staten, a establece e siguiente landsverordening:

Den articulo 1, despues di e definicion di ‘presupuesto,’ ta introduci cuatro definicion adicional, denomina; Presupuesto Plurianual, un resumen cu e entrada y gasto pa minimo cu cuater aña despues di e aña di servicio concerni; Saldo di Financiamento, e suma cu e Pais ta resta of tin riba base di cash durante un aña; Gasto di Capital, e gastonan cu segun e System of National Accounts di e Nacionnan Uni ta keda registra na e cuenta capital di gobierno; Ratio di Debe, e totalidad di debe di e sector colectivo, expresa como porcentahe di e producto interno bruto di Aruba.

Pa loke ta con articulo 14 ta wordo formula, e documento ta indica cu e Colegio di Supervision ta evalua e presupuesto y e datonan di ehecucion di e ministerionan y di e otro partinan di e sector colectivo di Aruba. Pa esaki tin algun norma na luga.

Primeramente den e presupuesto y e presupuesto pa varios aña, mester tin e gastonan di personal cu por lo menos mester wordo cubri door di e medidanan cu a wordo tuma pa cubri e gastonan aki, incluyendo gastonan pa maneho y mantencion di inversionnan plania; E Gasto di Capital cu ta ser tuma mester por lo menos wordo cubri door di e medidanan cu a wordo tuma pa cubri e gastonan aki teniendo na cuenta e entrada spera for di e placa di prestamo.

E saldo di financiamento di e sector colectivo mester tin un surplus di por lo menos 1% di e producto interno bruto; E proporcion (‘ratio’) di debe mester mustra un reduccion pa no mas hopi cu 50% di e producto interno bruto na 2040; E suma maximo cu ta wordo presta den un aña ta e suma pa refinanciamento di prestamonan cu ta venci y tambe pa cubri e gastonan di capital pa activonan fiho material y inmaterial, ta e suma cu mester wordo refinancia na un aña menos, pa asina tambe cubri e resto di financiamento y esaki ta wordo usa den su totalidad pa reduci e debe nominal di Aruba.

Den e evaluacion menciona, e reglanan di e siguiente presupuesto ta conta como normanan; e suma total di gastonan di personal di Aruba, pa no mas tarda cu 31 di december 2027, no ta sobrepasa 10% di e producto interno bruto; den e presupuesto ta inclui medidanan di politica structural pa logra e norma di gastonan di personal pa 31 di december 2027; den caso cu e suma cu ta resta ta mas abou cu e suma restante financiero minimo, e entradanan extra relativo na e presupuesto estableci ta wordo usa completamente pa reduci e debe.

Den caso di un suma restante cu ta mas halto cu e suma restante financiero minimo, e entradanan extra realtivo na e presupuesto estableci ta wordo distribui of ya a wordo distribui, via un tiki-taka di 50%-50%, pa reduci e debe y pa inverti den e servicio di capital pa stimula e economia; entradanan extra na parti di entradanan no ta wordo usa pa cubri gastonan adicional of politica nobo.

Posibel desbentaha of accionnan di politica cu tin consecuencianan presupuestario ta wordo cubri door di entradanan extra of reduccion di gastonan na otro parti; den e marco di gastonan tin caba medidanan di compensacion pa cubri desbentahanan structural y pa cubri desbentahanan ocasional ya sea di forma structural of ocasional;

E placa cu ta keda liber door di e beneficionan di interes cu por surgi debi na e registro vigente di Reino Hulandes, ta wordo inverti pa baha e gastonan di debe y di interes y pa baha e debe nominal di e debe di estado; e beneficio di interes no ta wordo inverti pa realisa e norma pa e suma restante financiero; si aplica, ta procede cu e reglanan di presupuesto cual a ser estableci door di e decreto nacional teniendo cuenta cu e reglanan general.

Mas di e cambionan den e Landsverordening Aruba Tijdelijk Financieel Toezicht (LAft) den nos edicion di mañan.