Siman a habri cu otro reunion turbulento den parlamento. Prome no por a cuminsa pasobra tabatin un problema cu suministro di coriente pero finalmente reunion por a sigui. Seguidamente lider di fraccion gubernamental a bin cu e proposicion pa suspende e reunion, den un intento pa posterga e confrontacion cu sin duda lo a bin ora mester a vota riba e amienda encuanto registracion di union entre partner di mesun sexo. Aparentemente no tin union den e fraccion y no a yega na un acuerdo riba esaki. Aki por a mira e bentaha di tin un presidente cu no ta pertenece na e fraccion di gobierno. El a contesta corectamente cu ta trata di un ley cu tin mas di cinco aña ta prepara y cu no por para henter e proceso meramente pa un amienda proponi pa un parlamentario. El a sugeri corectamente pa e parlamentario considera sea mantene o retira su amienda, pero cu e reunion lo sigui.
Despues di e prome tanda, ora cu tabata turno pa e ministronan presente, esnan di cartera di Husticia y Labor, a bin e siguiente intento pa para reunion. Ministro di Husticia a propone, mirando e cantidad di asunto cu lo mester contesta, y e tempo cu esaki ta bay exigi, pa suspende e reunion, sin duna fecha y ora. Despues di bastante discusion, unda lider di fraccion a propone te mita di september por lo menos, y cu un presidente como unico na fabor pa continua, a dicidi cu ta pasa pa suspende e reunion. Con tal cu finalmente cu un voto contra, esun di e presidente, a dicidi di posterga e reunion te dialuna venidero. E presidente, haciendo uzo di su facultad pa dicidi ki dia ta sigui, a pone e reunion pa dialuna awor, 10:00 am.
E bataya sin embargo no tabata trata solamente di e intentonan di gobierno y su fraccion pa gana tempo, pero a papia contenido tambe den e prome tanda. Critica pisa y na su luga a bin di banda di oposicion pa e forma con gobierno no a dedica ningun esfuerso na informa pueblo tocante e cambionan grandi cu ta keda introduci via e cambionan den Codigo Civil, cu hunto ta trata di centenares di cambio grandi y chikito. Algun di nan a bin dilanti den e debate, por ehemplo e cambionan den derecho di herencia cu tin repercusion bastante grandi cu absolutamente no ta conoci den comunidad.
Otro asunto tabata cu e cambio den ley di registra fam lo bay haci posibel pa un persona scoge pa un yiu haya fam di un welo o wela, algo cu ta parce di no tin ningun sentido y un hende normal lo ta puntra su mes ta ken ta pensa e barbaridadnan aki pa hinca den ley. Tambe tabatin pregunta encuanto di cambionan den e capitulo di Labor den Codigo Civil. Ora mira y tende e critica funda riba e cambionan proponi, ta surgi e pregunta ta pakico, despues di añanan di preparacion, ainda e cambionan den Codigo civil ta mustra curu y mal pensa. Den e sentido aki por bisa cu e peticion di ministro pa posterga e reunion pa dune oportunidad pa drecha e asunto no tabata solamente un ‘move’ tactico pa kita e atencion for di e asunto di e amienda, pero di berdad e lo mester bay sinta cu su expertonan pa drecha varios cos.
Riba esey ta bin e asunto cu gobierno no a haci nada den comunicacion cu pueblo pa trece e cambionan proponi na nan atencion. Ta berdad cu un bon campaña di informacion ta costa placa, pero lo ta placa bon inverti. Di otro banda, tin hopi informacion cu por duna den forma digital cu tin un costo minimo. E problema cu ta hunga un papel importante ta mas bien e mentalidad, unda tur atencion ta bay na e shownan pa purba convence hende di locual gobierno ta haya importante pa pueblo kere. Den nan vision, aparentemente informacion den e asuntonan trata den Codigo Civil no tin importancia y por lo tanto no ta dedica atencion na nan.
Cu e siman extra pa delibera den e partido den gobierno no ta anticipa cu lo bin tanto cambio. Den e dianan cu a pasa tabatin bastante reunion y consulta, sin resultado. Ta keda algun parlamentario di fraccion gubernamental cu no por aproba e amienda y di banda di oposicion a bira cla cu no mester spera nan apoyo pa e amienda keda aproba, ya cu nan ta considera cu un asunto di tanto peso no por pasa den un amienda, sin e debido conseho di e organo estatal pa cu esaki den forma di un ley of cambio di ley. Si gobierno no logra convence e parlamentarionan cu ta contra, of troce nan brasa di un of otro manera, por ta cu dialuna awor e amienda lo no sobrevivi.
Mirando e otro asuntonan di peso cu lo mester sigui proximamente, e ley di all-inclusive, e ley di Citgo, presupuesto 2017, ta di suma importancia pa gobierno mantene e 12 votonan den parlamento. Dianan interesante…
