E cambionan cu gobierno di Aruba lo mester haci den e ley di supervision financiero di Aruba mes (Landsverordening Aruba financieel toeicht; LAft), ta parce di bira un problema bastante urgente.

Siman pasa Promer Ministro mes a biaha pa Hulanda pa atende e asunto di e cambionan riba e ley personalmente den Conseho di Ministro di Reino. A comprende si su declaracion cu no tabata posible haya un aprobacion di e cambio di ley manera Aruba a entrega esaki. Hulanda, segun gobierno di Aruba, na ultima ora lo a bin cu tres asunto cu nan kier a mira atendi ainda den e cambio di ley. Por lo tanto no a aproba nada y a remiti e asunto na negociacion entre gobierno di Aruba y secretario di estado Hulandes, pa inclusion di e aspectonan pendiente aki. Tempo a bira un problema pasobra tin basta asunto pa trata den parlamento, entre otro presupuesto 2024 cu mester ta aproba pa mas tarda mitar di december.

Di otro banda, e promer mandatario mes a declara cu ta trata di cambio cu ta aceptable pa su gabinete. Ta trata segun gobierno di Aruba di tres punto:

  • Condicion uno: administracion financiero (financieel beheer) unda “ministro di finanzas mester duna extra informacion di e maneho financiero”.
  • Condicion dos: e palabracionnan cu Aruba mester haci cu CAft riba e tema di gastonan di personal promer cu e ley drenta na vigor;
  • Condicion tres: relaciona cu proyectonan ‘PPP’.

Condicion 1: Maneho financiero; esaki ta referi, segun nos, na e condicion den e propuesta di ley di Reino di 2022, unda ta amplia riba e texto existente di e ley di Aruba, cu un “mehoracion di e administracion financiero’, en bes di e texto original, cu ta papia solamente di reporta encuanto e estado di asunto (stand van zaken) di e administracion financiero. Pa esaki, ta amplia tambe encuanto e modelo cu ministro encarga cu finanzas mester acorda cu CAft pa e reportahe, tambe pa dicidi cual ta e temanan riba cual lo reporta. Tambe den e reportahe ministro di finanzas di Aruba mester indica di ki manera e recomendacionnan haci pa CAft, y tumando na cuenta tambe eventual recomendacion di Centrale Accountantsdienst y Algemene Rekenkamer, ta keda implementa. E parti di trece dilanti e recomendacionnan ta den e ley existente caba, loke ta nobo ta e obligacion di e ministro encarga pa indica di cual manera ta duna siguimento na e recomendacionnan.

Condicion 2: Gasto di personal; E propuesta di ley di Reino ta pone como criterio cu pa 31 di december 2027 e gastonan total di personal lo ta maximamente 10% di e Producto Interno Bruto (PIB; GDP) di e momento ey. Tambe ta propone cu den presupuesto (na caminda pa 2027) mester tin inclui “medida structural pa por alcansa e norma di gasto di personal na 31 di december 2027). Nos ta supone cu esaki ta loke ta e asunto na cual Promer Ministro ta referi. Punto importante den esaki ta cu pa calcula e norma aki, mester acumula tur gasto di Pais Aruba, mas e alto colegionan di estado (Staten, RvA, Rekenkamer), DOW y fondonan di presupuesto y e gastonan paga pa partnernan externo, directamente o via contrato, tambe gasto di personal di e entidadnan di seguro social (AZV, SVb), subsidio di salario pa ‘Bijzonder Onderwijs’, gasto di personal di ex-empleado publico, incluyendo gasto di VUT y wachtgeld, y pago di pension riba gasto di ‘exploitatierekening’ (‘uitkering bij wijze van pensioen’). Como aclaracion: te awor e LAft y e Protocolnan tabata contempla solamente e gastonan di personal di e ministerionan, loke tabata representa e suma bao di e limite di Afl. 479 miyon (den e protocol 2018). E gastonan total manera tuma na cuenta pa e norma di 10% di GDP ta abarca un suma di riba Afl. 600 miyon den e situacion actual.

Condicion tres: tin di haci cu proyecto ‘PPP’; esaki no a haya un splicacion mas aleu di parti di gobierno. Loke si por bisa ta cu e propuesta di ley di Reino ta contene un capitulo dedica na e tema aki, cu no ta aparece den e ley di Aruba . Eyden tin formula cu Aruba no por haci compromiso nobo di colaboracion ‘publico-priva’ (PPP; red.), a menos cu Conseho di Ministro di Reino aproba un peticion di gobierno di Aruba. CAft mester conseha gobierno di Aruba den esaki y e colaboracionnan publico-priva aki mester aparece riba balans di Aruba su administracion financiero y mester aparece den presupuesto di Aruba.

Mas comentario den nos Editorial di nos edicion di awe.