Minister di Finanzas, Asunto Economico y Cultura, Xiomara Maduro a informa cu nan a bin cu un di dos cambio riba presupuesto 2020 debi na e impacto cu e pandemia a ocasiona riba nos economia y finanzas publico.
El a laga sa cu e di dos presupuesto ta presenta reduccion di cierto gasto compara cu esun prome, entre nan esun di gasto di personal. Sinembargo cierto beneficionan cu empleadonan di sector publico ta gosa di dje, manera bashi premie, najaarspremie y reparatie premie, si ta wordo inclui, pero teniendo na cuenta loke e ambtenaar a entrega pa atende cu e fondo di solidaridad.
Bon Dia Aruba ta trece dilanti cu e beneficionan aki a wordo acorda dia 26 di augustus 2010 door di e diferente partner cu a participa den e dialogo social, tempo di gobierno anterior. Un acuerdo cu ta core te cu aña 2024, caminda a pone preto riba blanco cu e aumento total di e premienan aki na 2024, lo ta igual na un 7.6% di e ingreso acorda.
Minister Maduro a indica na comienso cu e crisis a bati nos porta, gobierno a pidi solidaridad for di empleado publico. Nan a kita 12.6% for di salario di ambtenaar. Mientras e ministernan y parlamentarionan a corta 25% di nan salario pa mustra nan solidaridad den e momento cu nos ta pasando aden. Igualmente gobierno a corta for di companianan estatal un 12.6% pa atende cu e fondo di solidaridad.
Encuanto pa loke ta trata e bashi premie y e otro premienan, minister Maduro a bisa cu gobierno a yega di anuncia cu esey ta bay na mitar. Vakantie uitkering tambe a bay na mitar. Y tambe tabatin 5% nan salario a wordo corta cune. El a bisa cu nan tur ta den e di dos concepto di presupuesto 2020.
Igualmente nan a bin cu cambio riba gasto di personal cu a baha no solamente dor di e reduccion of entrega di salario. Pero tambe conforme cu e plan a implementa pa baha gasto den aparato di gobierno. E reduccion aki riba su mes a produci 3 miyon florin menos.
