Cambio positivo na Dimas y Labor?

E siman aki nos por a tuma nota di algun cambio den e proceso di atende peticion pa persona di exterior haya estadia legal, sea pa traha o pa permanece temporalmente di otro forma. Un di e cambionan ta un sistema digital nobo pa Dimas, cu mester ta un adelanto grandi compara cu e sistema bieu. E anuncio cu lo tin un colaboracion mas estrecho entre departamento di impuesto y Dimas, cu ta haci posibel paga lo necesario relaciona cu un permiso di estadia na Dimas mes, eliminando e caminata entre ambos departamento di miles di hende anualmente, ta bon noticia. De paso ta scoge pa no acepta placa cash, loke pa cierto cliente por ta fastioso, y nos no sa tampoco si legalmente ta posibel pa nenga un ciudadano paga cash, pero en todo caso e ta elimina e posibilidad di mal maneho, o pio, di placa cash. Den cuadro di reduccion di riesgo den maneho di recurso financiero esaki ta un bon paso.

Ta di spera si cu e mehoracion no ta keda limita na esaki. Tin varios otro asunto cu por mehora. Un di nan ta relaciona cu e hecho cu Dimas, cu tabata pertenece na otro ministerio, desde e siman aki ta cay atrobe bao di e ministro encarga cu Husticia. Awor cu esey ta asina, y nos ta aproba esey cien porciento, anto lo mester pensa riba un forma di integra e informacion di Dimas y IASA. Di e reportahe den nos propio corant nos ta haya e impresion cu e colaboracion ta basa ainda riba esun entre dos entidad cu ta resorta bao dos diferente ministerio. Hasta den e caso cu esey ta asina, no tin motibo pa no conecta informacion digital ‘real time’ na logra di ta intercambia informacion den catch semanal, loke ta e caso awor, segun e directora di Dimas. Asina ainda no ta resolve e problema di e stranhero cu ta haya problema na aeropuerto na su salida, pasobra Migracion tin informacion outdated cu ta duna e persona como ilegal pasobra e lo a keda atras, sin haci peticion pa extende su estadia den forma legal.

Otro paso positivo lo ta e posibilidad di tramita un peticion via trayecto digital. Algun aña atras departamento di Impuesto mes a cuminsa cu un proyecto similar, pa facilita e usuario pa diferente tipo di impuesto pa haci declaracion online. Lamentablemente e proyecto no a prospera y casi tur cos ta sucede ‘old school’ ainda, inclusivo e pago di impuesto riba vehiculo, cu e carnaval di custumber tur inicio di aña. Ban wak si e aña aki atrobe e usuario cu ta kere cu e ta haci e departamento y su mes un fabor pagando na banco, ta esun cu ta sali perhudica y ta e ultimo pa por haya su sticker.

En todo caso, e posibilidad pa e miles di cliente di Dimas haci peticion online lo significa un adelanto hopi grandi, cu nos lo tin gana di mira ripiti den practicamente tur servicio gubernamental. Pero, tin un ‘pero’ si. Esey ta cu mester dedica atencion tambe na e aspecto di siguridad y integridad. Esaki ta implica cu e sistema mester conta cu e posibilidadnan pa vigila e procesonan di inicio te final, cu registracion di tur accion o cambio cu ta haci den e sistema. Si no haci esaki, ta bira dificil pa averigua na cierto momento ta ken a cambia kico, y pakico, y esaki den un trayecto cu ta keda sensitivo pa fraude y corupcion. Y sinceramente, nos a mira y tende suficiente den ultimo añanan, specialmente e aña aki, di tur e cosnan cu por bay robes.

Di e banda aki ta grato pa tuma nota di un prome paso di e mandatario di Labor, pa para e proceso di ‘ontheffing’ te proximo aviso. Esey ta bon pero no suficiente. Un prome pregunta cu mester contesta den esaki ta, si ta pone e decision di e conseho laboral den man di un funcionario publico, digno di carga e responsabilidad ey, y rondona e persona cu e control interno necesario, pa controla kico e ta haci. Esaki no por ta otro; confiansa sin control no mester existi. Di otro banda, si ta considera reintroduci e ‘ontheffing’ como e ‘Si’ di e ministro concerni, despues cu un peticionario ta bay reclama cerca e ministro cu e funcionario encarga a bisa ‘No’, anto ta habri porta atrobe pa un trayecto no transparente, cu tur e riesgonan cu esaki ta encera. No pa prome biaha nos ta recorda nos lector cu tabatin un tempo cu ‘ontheffing’ no tabata existi y cu e Si o No di e funcionario tabata final.

Awor, claro cu por argumenta cu den pasado tambe tabata sucede incidente cu cambio di conseho no transparente, pero esey tabata mas bien pasobra tabata falta e control interno, manera esey ta haci falta den mayoria di departamento den gobernacion di Aruba. Aki ta unda nos ta sinti e necesidad pa gobierno nobo, y sigur awor cu nan mes a acepta e reto di restructura y mehora prestacion di gobernacion den e periodo nos dilanti, ‘bisa loke nan ta haci’, y ‘haci loke nan ta bisa.’