Water- en Energiebedrijf Aruba N.V (WEB) su director Alfredo Koolman ayera mainta a realisa un conferencia di prensa pa splica comunidad kico a sucede diasabra ultimo ora Aruba a haya un otro blackout.

Manera a bira conoci, Aruba a confronta un otro blackout diasabra ultimo cerca di 8.15pm unda Koolman a informa cu WEB Aruba N.V a haya un incidente den planta cu a conduci na un situacion di blackout, e prome informacion cu nan a ricibi for di organisacion ta cu e compania ta evalua, investiga y traha un plan di recuperacion loke a tuma luga e mesun dia ey.

Pa 9or di anochi di diasabra ultimo segun Koolman a señala, nan tabatin un impresion caba di un problema cu nan mester investiga tocante nan sistema di control, “den switchmento over di un sistema pa bay otro, loke nos a yama di un control local pa e control system, eynan nos tabatin e problema cu a conduci cu nos a perde unidadnan y esey tabata di un tal capacidad cu a pone nos den un situacion di blackout”, el a declara.

Pa 10or di anochi e suministro di energia a cuminsa bek na cierto barionan unda cu esey a tuma luga conforme e plan y nan tabatin bon contacto cu tur stakeholders “di nos banda nos tabatin contacto cu media, cu nos bertuursnan, minister, directornar di Utilities y Elmar unda cu nos tin indicacion di kico a conduci na blackout y nos ta comparti cu cautela” el a bisa.

10 minuut pasa di 11or di anochi nan a recover Aruba completo cu suministro di coriente caminda Koolman a enfatisa cu nan ta lamenta loke a sucede, “nos sa cu e impacto ta grandi pa nos comunidad, unabes cu nos tin un incidente asina e ta importante pa conhuntamente cu coleganan y Elmar a haci todo por todo pa recupera mas pronto posibel y manera cu nos a comunica anteriormente, nos compania ta pasando den un transicion”, el a menciona.

Igualmente el a informa cu diahuebs di siman pasa nan a baha e central di vapor despues di mas di 60 aña unda nan a sak’e for di servicio pa asina por haci e transicion den periodo di motor 100%, el a splica cu nan ta bay na modo di motor pa motibo cu “esey ta mucho mas eficiente cu e sistema bieu, sinembargo, pa hopi biaha esaki ta bay cu un set backs, cu incidentenan den ultimo lunanan unda nos tabatin un cantidad di blackouts cu nos a comunica cu nos a bay core riesgo eynan y cada bes cu nos tin incidente manera esaki, nos a saca e foutnan for di un proyecto grandi”, el a sigura.

Nan lo continua den e proceso aki y despues di un incidente manera diasabra ultimo cada biaha nan ta tuma medidanan pa percura cu esey no lo ripiti y na mesun tempo nan ta percura pa tuma contacto cu nan stakeholders, den caso aki e supplier di e motornan Wartsila caminda cu nan a indica kico nan ta pasando.

“Pero en bista di ultimo incidentenan nos a tuma un contacto na un nivel mas halto y cu aworaki nos ta urgi pa nan tambe pone atencion na e proyecto y pa yuda nos den e proceso dificil akinan”, Koolman a comenta.

Ademas, el a bisa cu nan mester keda cu cautela y keda vigila e unidadnan unda el a enfatisa cu nan sospecho ta cu nan tin un problema den sistema di control y nan ta haciendo tur esfuerso, tanto hendenan di operacion como e hendenan di ICT conhuntamente cu e representantenan di Wartsila cu ta haci nan esfuerso pa por determina kico ta e problema y con nan por resolve esey.

“Atrobe esaki ta un transicion enorme di vapor pa motor pa e motibo di ta mas eficiente, nos ta entrenando nos hendenan intensivamente y nan tin e conocemento, sinembargo, esaki ta setbacks cu nos ta pasa den dje ora bo tin un situacion di e magnitud akinan”, Koolman a señala.

E parti di transicion ta keda algo cu ta keda cu atencion di nan y si nan mester di ayudo nan mester a busk’e na Wartsila pero tambe den ultimo dianan aki nan a yega na e intensificacion di esey.

For di diabierna caba a surgi cierto hechosnan pero nan tabata tin’e den control y nos tabatin tur e confiansa cu e trabou cu aki ta exigente, diasabra anochi prome cu e blackout a lo a tuma luga nan a yega di atende cu e problema di control cu tabata den e fase den bay bek riba operacion normal y eynan nan a haya e incidente, “nos no a anticipa cu nos tabatin un incidente den e swichtmento eynan di un sistema pa otro”. Koolman a informa.