Recientemente, Oficina Central di Estadistica (CBS) a publica su Indice di Prijs di Consumo (CPI) pa luna di september ultimo. Entre otro, a informa riba e cambio di prijs di petroleo, utilidad, gasolin y diesel den e luna en cuestion. Aunke prijs promedio internacional pa bari di petroleo a conoce aumento compara cu un luna prome, e prijs di electricidad y awa no a cambia.
Prijs di utilidad (electricidad y awa), gasolin y diesel ta wordo determina primordialmente door di e prijs internacional di petroleo. Na September 2023 e prijs promedio pa bari di petroleo (US$ 88.11) a conoce un subida di US$ 6.77 (8.3%) compara cu Augustus 2023 (US$ 81.34). Prijs di electricidad y di awa no a cambia compara cu Augustus 2023. Consecuentemente, e prijs promedio di electricidad pa vivienda a keda Afl. 274.57, mientras cu e prijs promedio di awa pa vivienda a keda Afl. 168.73.
Prijs di gasolin a registra un subida di Afl. 14.90 cen (5.5%) na September 2023 y a causa un efecto di 0.29 ppt riba e CPI. Prijs di diesel a registra un subida di Afl. 26.10 cen (11.6%) na September 2023 y a causa un efecto di 0.04 ppt riba e CPI. Na September 2023, utilidad, gasolin y diesel como grupo, tabatin un subida di prijs di 1.9% compara cu Augustus 2023 y hunto tabatin un influencia di 0.33 ppt riba e CPI, mientras cu e restante 404 bienes y servicio hunto, a conoce un subida di prijs di 0.8% y tabatin efecto un efecto di 0.66 ppt riba e CPI.
