Falta 10 dia so pa e cambionan den e ley di seguro di malesa y accidente ta drenta na vigor. Pa tal motibo Banco di Seguro Social (SVb) a bin cu mas informacion ayera pa asina tur doño di trabou y trahadonan ta na altura di e cambionan aki.
“Awe mainta nos ta aki pa coleganan cu ta experto riba e tereno aki duna boso un splicacion pa asina boso por transmiti esaki na comunidad di Aruba, kico exactamente e cambionan aki ta encera”, asina director di SVb, sr. Edwin Jacobs a declara.
Cambionan
El a bisa cu 28 di april ultimo, Parlamento di Aruba pa medio di y un amienda a otorga SVb un extra autoridad pa otorga boet den caso cu e doñonan di trabou no ta cumpli cu e ley di inscripcion di nan trahadonan cerca SVb. “Esaki ta hopi importante pa doño di trabou ta altanto di kico esaki ta encera”, sr. Jacobs a bisa.
E ehecutivo aki a bisa cu den e ultimo siman tur doño di trabou a haya un carta, unda ta wordo anuncia previamente cu e cambionan aki lo drenta na vigor. Tambe loke ta trata e cobransa profesional adicional tambe ta cla pa sali, el a bisa. Pa asina e doñonan di trabou cu e adaptacionnan aki tin efecto ariba nan, por cuminsa contribui entrante augustus pa cubri e luna di juli.
Ahustacion y formulario
Den e conferencia aki, sra. Marisol Thiel y sra. Ivy Guerrero-Wolff kende a duna informacion adicional riba e cambionan aki y instrumento nobo cu a keda introduci. Nan a presenta e formulario nobo di inscripcion pa sigura e trahadonan. E formulario nobo ta wordo entrega na momento cu bo tin un trahado nobo, ya cu e trahado cu ta den servicio caba y debidamente registra na SVb, no mester registra atrobe.
Entrante otro luna lo bin cu e formulario nobo di inscripcion caminda e trahado mester registra su mes cerca SVb cu un ID valido. Ta asina cu entrante prome di juli tur doño di trabou (ya sea persona natural of persona huridico) tin e obligacion pa duna nan trahadonan nobo un formulario di inscripcion di SVb di e model nobo cu nan a introduci. Tambe e trahado mester haya e oportunidad pa bay inscribi na SVb, prome cu e ta bay cuminsa su prome dia di trabou of riba e prome dia di trabou durante oranan di trabou. Actualmente SVb tin sigura alrededor di 40 mil trahado pa seguro di accidente y malesa; y 3.200 doño di trabou ta contribui cu e fondonan aki tambe.
El a bisa cu un grupo di 2800 trahado adicional ta bin acerca pa e seguro di malesa. Sinembargo considerando cu e 2800 trahado aki ta sigura caba pa seguro di accidente, pues nan no mester presenta pa inscripcion pasobra nan ta den nan sistema caba.
Sra. Marisol Thiel a bisa cu entrante 1 di juli lo bin un ahustacion di e “premieloongrens” y e ta bay aumenta conforme e ley di Seguro di Malesa y Seguro di Accidente. El a bisa cu loke tabata a luna actualmente 4.500 fls e ta bay bira 5850 fls. Esaki ta encera pa cu e trahadonan cu entrante 1 di juli tin un salario di 5850 fls of menos ta bay ta sigura pa e seguro di malesa.
“Kiermen cu pa nan tambe ta conta cu na momento cu nan ta sinti nan mes malo nan ta haya SVb y avisa malo y e proceso di AO ta inicia”, el a bisa. Pues nan tin cu pasa cu e proceso normal di control cerca SVb mescos cu e trahadonan cu tin un salario di 4.550 fls. Of menos.
Sra. Guerrero-Wolff a bisa categoricamente cu tur doño di trabou cu tin trahadonan den nan servicio, ta obliga pa inscribi nan na SVb. “Tur persona cu ta ricibi un salario mester wordo inscribi na SVb”, el a bisa. No ta importa si e trahado ta traha part-time of no sino cu a base di bo salario e seguro ta wordo cobra.
Sr. Jacobs a haci un apelacion na e doño di trabou cu ta paga salario minimo cu a wordo ahusta pero cu no a indica esaki na SVb, el a pidi pa nan manda e formulario di e montante di cambio pa asina informa SVb cu e salario minimo di nan trahado a wordo adapta. Igualmente el a laga sa cu e doño di trabou cu ta bin cu trahado di afo cu permiso, e no por sigura e bou di e salario minimo. Esun cu no ta manda e tipo di informacion aki pa SVb relaciona cu su trahado di afo y loke e ta gana, nan ta bay confronta cu SVb ta bay coy e salario maximo pa manda e cobransa. Nan lo bin cu man duro riba e situacion aki caminda nan lo manda un advertencia pa bin paga y despues nan lo manda Deurwaarder.
Autoridad pa duna boet
Otro cambio tin di haber cu e boet cu lo bin cun’e. Den caso cu e doño di trabou no ta cumpli cu e obligacion di inscripcion aki, SVb tin e autoridad di duna e doño di trabou un boet te un suma maximo di 500 mil florin. “Na momento cu nos bay haci control na empresanan y nos ta constata cu tin trahadonan cu no ta inscribi e doño di trabou of esun cu a comete e falta por haya un boet cu ta yega te un maximo di mey miyon florin”, segun sra. Thiel.
SVb a constata a base di nan control –segun sra. Thiel- cu tin trahadonan cu no ta inscribi. Recientemente a base di un control cu nan a haci conhuntamente cu Dimas nan a constata cu tin varios trahado cu a haya permiso pa traha na Aruba cu no ta inscribi na SVb tampoco. E cifra aki ta alarmante ya cu rond di 33% di e personanan cu tin un permiso di trabou no ta inscribi na SVb. Director di SVb a laga sa cu entrante pronto, e ta supone cu pa entrante juli of augustus, Dimas ta bay pone como exigencia e prueba di inscripcion na SVb pa cualkier tramite di permiso.
E cifra aki nan por a identifica a base di informacion cu diariamente nan ta ricibi fei Dimas di e personanan cu ta bin pa prolonga su permiso, y asina check si nan ta registra cerca SVb.
