Tabata dia 31 di maart cu minister di Finanzas Xiomara Maduro hunto cu expertonan di Departamento di Finanzas, Departamento di Aduana y Departamento di Legislacion a reuni cu e Comision Financiero di Parlamento pa informa riba e propuesta di Ley pa cobra BBO na frontera cu mester ta cla prome cu dia 1 di juni.
E mesun siman ey, a manda e ley pa Raad van Advies pa e por cuminsa cana su caminda legal, anticipando riba entrega di e concepto di ley na Parlamento. Minister Maduro a bay informa Comision Financiero di Parlamento riba e contenido di e Ley pa introduci cobransa di BBO na frontera dia 1 di juni.
Pero e cambio di ley te ainda no a yega na Parlamento di Aruba manera parlamentario Miguel Mansur di partido Accion21 a informa na redactor di Bon Dia Aruba ayera atardi.
“Ta practicamente imposibel pa e ley keda cla pa 1 di juni, ora e yega Parlamento normalmente ta duna 2-3 siman pa Parlamento studia e ley y haci pregunta,” el a sigura.
Gobierno di Aruba mediante minister di Finanzas, a informa cu di e Plan di Impuesto 2023 y ‘compliance’ por bisa cu esaki a drenta na vigor y trabounan tabata haci pa fin di februari por tin un concepto di ley pa introduci BBO na frontera. Esaki ta premira di bay yuda grandemente riba e tereno di compliance. Banda di esaki, den e prome kwartaal Aruba ta bay haya yudansa di IMF/CARTAC pa asina adresa compliance den, entre otro, e sector di turismo na Aruba.
Dia 5 mei tambe Gobierno di Aruba a informa cu a tuma luga reunion cu diferente stakeholder tocante e tema aki pa asina ey intercambia informacion, experiencia y preguntanan tocante introduccion di e impuesto aki.
Redactor di Bon Dia Aruba tambe a purba di haya un entrevista cu director di Departamento di Impuesto pero, no a haya un contesta.
Igualmente ATIA a manda un invitacion na un conferencia di prensa cu lo tuma luga dialuna ultimo tocante e topico aki.
