Dialuna mainta durante un conferencia di prensa, Prome Minister Evelyn Wever-Croes a splica tocante e reunion cu a tuma luga na Conseho di Minister, unda el a ricibi peticion pa asisti y asina confronta e situacion cu Aruba ta aden actualmente.
Despues di cambio di ley di Laft cu a ser entrega na parlamento, nan a compronde for di Hulanda cu no ta un decision cu ‘nan no por biba cune’. Sinembargo, e protocol cu a firma cu Hulanda, ‘e norma cu a palabra’ ta esey ta loke ta valido y ta cumpli cune.
“Pa nos, supervision ta importante. Aruba sin supervision, no ta posibel mas”, e mandatario a expresa. Na 2015 a bin cu ley cu no tabata di acuerdo cune, pa haci Raad van Advies un tipo di ‘tweede toetsing’ unda cu un di dos instancia ta mira e presupuesto pa haci cambio den dje den Parlamento of ta bin cu un propio ‘begrotingskamer’.
Segun e mandatario asina a bin alternativa. “Den reunion a bisa cu nos ta trahando riba alternativa di supervision. Kico lo bin na luga di Caft. E begrotingskamer ta algo cu nos ta papiando di dje for di basta tempo.”
Mester entrega e ley na gobierno reciente, pero mirando cambio, ta bay acelera e proceso pa bin cu e camara di presupuesto, anto a bisa cu nan mester di tempo pa por keda cla cune.
A institui e organo cu ta trahando pa reemplasa Caft, unda nan ta supervisa, ‘e ta bay cu pais Aruba su constitucion pero mester haci e trabou’. E mandatario ta aclara cu no lo bin instruccion. Pero pa e siguiente siman lo traha riba e asunto y Hulanda mes a bisa cu no tin ningun ‘rush pa e tema aki’.
“Nos ta bay riba un ‘pace’, sinembargo nan kier mira si cu ta haciendo algo al respecto. Tin relacion cu Reino, ta stabiel y asina nos kier want’e. Ora espacio pa e begrotingskamer keda cla, lo presenta esaki na prensa”, el a bisa.
Pa locual ta trata e declaracion di Hulanda, ta bisa cu no ta di acuerdo cu cambio di ley. Nan no kier un supervision na Aruba cu no ta cay bou Conseho di Minister di Reino, pasobra ta algo cu nan no por tin ‘control riba dje’.
El a bisa cu e no tin mesun opinion, pasobra di cual manera por keda controla. “Nos tin statuut cu ta keda existi. Na 2014 no tabatin Laft ni Caft, pues e control ta keda. Hulanda a bisa cu Caft no ta bay keda, pero nos mester, pasobra no por keda sin supervision. Aruba no kier e problema ey”, el a expresa.
Prome Ministro a bisa cu mester evalua e ratings agencies internacional y no kier pa Aruba core peliger. Pa e momento lo warda un par di siman pa bin cu un organo di supervision bon hinca den otro, pa por laga e ley drenta na vigor. E meta no ta pa tene Hulanda contento pero sino pa Aruba, anto e rating negativo lo haci daño.
“Pa e motibo aki, cambio di LAft sin supervision ta inaceptabel. Lo acelera e proceso pa yega na un Camara Presupuestario, anto esey lo cay bou supervision di Conseho di Minister di Reino. Tin cu reconoce cu nos no ta un pais independiente, nos ta autonomo y Reino tin regla, tin cu acepta nan regla y bay den palabracion”, e mandatario a finalisa.
