Sigur den ultimo decada e debate riba cambio di clima mundialmente ta birando mas fuerte, y nos region di Caribe no ta un excepcion. Mientras cu a yega na aña 2015  na un acuerdo cu practicamente henter mundo a firma, cu esey e critica di esunnan cu no ta kere den e realidad di cambio di clima no a desaparece. Al contrario, hustamente e lider nobo di e pais mas poderoso di mundo a dicidi di anuncia retiro di su pais di e acuerdo. Di e manera aki dunando un empuhe fuerte na e forsanan conservador den su pais cu no ta kere cu cambio di clima ta real, y mucho menos ta interesa pa bay paga pa combati esaki.

A proposito, un pais den nos region, Nicaragua, a keda sin firma, cu e argumento cu nan ta kere cu e cambio di clima ta un menasa real, pero cu nan no ta kere den e compromiso di e paisnan industrialisa cu a causa e desastre mundial aki, den nan vision. Den e articulo aki, no ta trata di analisa ken tin rason den e debate si e cambio di clima ta algo natural y inevitabel, o cu e ta algo cu por lo menos parcialmente ta causa pa intervencion humano, o ken a causa esaki. E clave ta pa cuminsa cu establece ki cambio climatico tin o lo tin den nos region y kico ta consecuencia y forma di combati esaki.

Lagando e escenario mundial pa loke e ta, ta importante contempla kico ta pasando den nos region, con ta atende e problema aki, y ki señalnan innegable por observa na e momento aki. Facilmente nos por haya persona cu ta argumenta cu ta papia tanto di aumento di nivel di lama, pero “mi no ta mira nada ainda”. Loke ta ilustra cu ta dificil pa convence hende si nan no por mira algo cu nan mes wowo. Pregunta ta anto kico te awor ta e señalnan clave di cambio di clima mas cerca cas.

Entre cientifico ta señala nos region, tanto e cuenca di Caribe como e costa Atlantico y Pacifico di Centro America como un region importante di estudio y analisis pa loke ta cambio di clima. E motibo ta cu un cantidad di fenomeno natural y climatico ta bin hunto den e parti di mundo aki, unda ta anticipa cu por studia di manera oportuno varios aspecto di e cambio di clima mundial. Ademas lo por studia tambe e forma y efecto di metodo di adaptacion social y economico cu ta tuma luga. Den e region tin un poblacion di mas di 120 miyon ta biba, pa un gran parti den areanan costal cu lo ta e promenan pa sinti efecto di aumento di nivel di lama, y cambio den composicion di bida marino, cu ta importante pa e parti di poblacion cu ta biba di actividad relaciona cu lama.

Ta bira anto indispensabel duna algun ‘hard facts’ indiscutibel di nos region.   Segun varios  estudio specifico di nos region,  e condicionnan climatico a conoce cambio reciente importante,  bao influencia di un combinacion di factornan atmosferico y oceanico. Nos ta solamente toca algun aspecto aki.

Aumento di temperatura di lama
Di 1982 pa 2012, e region a experimenta un tendencia acelera di aumento di temperatura di superficie di lama, cu ta varia di 0.161°C te 0.209°C pa cada decada. E incremento rapido di temperatura di superficie di lama y caida relaciona den yobida total den region Centro Americano y Caribe por ta e cambio mas notabel di tal cambionan den zonanan tropical y ta mustra consistente cu prediccionnan di clima. E incrementonan aki a acompaña un intensificacion di e ‘Atlantic Warm Pool’ (‘Golfstroom’) durante e temporada di yobida (August–November). E intensificacion aki por causa mas actividad di tormenta tropical. Kentamento excesivo adicional por conduci na sistema local di presion halto, cu por produci ola di calor, cu potencialmente consecuencia desastroso social y economico.

Cambio di clima mas amplio tambe ta influencia e region. Un aña 2015 hopi mas seco cu normal ta parce producto di entre otro e fenomeno di El Niño y un episodio largo di stof di Sahara. E resultado tabata un secura historico cu hopi perdida den agricultura y racionamento di awa den paisnan rond Caribe. Por ehemplo e casi desaparicion di awa den e dam Guri, cu ta abastece casi henter Venezuela di electricidad.  Ta parce cu e sucesonan aki ta hayando un caracter mas permanente, aunke e fluctuacion di aña pa aña ta keda existi.

E aumento di temperatura di awa di lama tin consecuencia grandi pa bida marino, manera coral, cu ta depende di un temperatura hopi exacto y stabiel pa por subsisti. Pa motibo di espacio nos no ta bay mas den detaye di e fenomeno aki.

Aumento di nivel di lama
Aumento di nivel di lama pa un region yen di isla chikito cu ta biba pa un gran parti di turismo naturalmente ta un nachtmerrie cu hopi di nos lo no ni kier pensa riba. Perdida di costa, cu un inversion biyonario na hotel y otro facilidad turistico, ademas di un gran parti di nan urbanisacion den e zona costero, lo tin consecuencia economico devastador pa tur pais. A pesar di tur esey, pa hopi hende den Caribe esaki ta zona ainda manera un ‘ver van mijn bed show’. ‘Cos cu ta pasa otro caminda pero aki no’… Si, e ta pasa otro caminda, pero no mucho leu di aki tampoco.

Lo bo keda sorprendi cu e tabel acompañante cu ta duna un impresion di e aumento di nivel di lama na costa Mericano di Golfo di Mexico, costa Oriental y costa Pacifico, den e cincuenta aña entre 1963 y 2012. Mientras cu na costa Pacifico (Los Angeles) e aumento tabata como 2,5 inch (6,3 cm), na Galveston (Texas) esaki tabata esun mas grandi: 12,5 inch (31,8 cm). Esaki lo mester ta suficiente pa nos pensa un biaha mas, si acaso nos tabata haya cu e cos aki no ta bay pasa aki. Problema ta si cu pa Caribe, specificamente e islanan ta dificil pa haya informacion tocante aumento di nivel cu ya a tuma luga. Estudionan ta mas orienta ainda riba proyeccion pa futuro, pa proximo 50 aña, y no riba aumento ya registra manera e caso di Merca.

Tur esey tin di haci naturalmente cu e hecho cu  inversion den investigacion encuanto cambio di clima y su consecuencianan ta apenas cuminsando den e region aki. Pa un gran parti principalmente e islanan chikito lo tin problema tambe pa inverti den estudio cientifico bastante costoso, y lo depende di ayudo internacional pa esaki.

Aruba
Finalmente, kico nos mes na Aruba ta haci al respecto. Mester bisa cu bastante atencion a bay na e tema aki, como parti di e tema mas general di desaroyo sostenibel, cu a keda concretisa entre otro den un conferencia anual patronisa pa gobierno, cu a logra capta bastante atencion internacional y a logra pone Aruba riba mapa mundial pa loke ta atencion pa e tema. Tambe e programa di disminucion di uzo di combustibel fossiel y e avance den direccion di energia renobabel a haya bastante atencion, aunke e criticonan lo bisa cu nan a spera mas di loke a logra den ultimo decada. Lagando e discusion ey un banda, ta importante lansa e pregunta kico Aruba por significa den atrae know how riba tereno di estudio di cambio di clima, den forma di bira anfitrion di un centro di estudio y analisis di cambio climatico. Pa nos por pretende cu nos por haci esey, ta indispensabel cuminsa cu auto financia e investigacion cu nos mester pa produci e datonan necesario di nos mes teritorio. Pregunta practico: nos ta midiendo den un forma cientifico con aumento di nivel di lama ta bayendo cerca nos?

 

Sierra Nevada del Cocuy: prueba lamentabel di cambio di clima

Sierra Nevada del Cocuy, den e parti di Cordillera Colombiano cerca di e historico ciudad di Boyacá, sitio di e famoso bataya di liberacion den tempo di Simon Bolivar, ta lamentablemente muestra palpabel di kico cambio di clima significa den practica.  Desafortunadamente  Sierra Nevada del Cocuy a resulta di ta un di e areanan mas afecta den nos region desde comienso di e fenomeno mundial aki. E glaciarnan a cuminsa  reduci considerablemente  y segun algun estudio cientifico, ta kere cu nan lo desaparece completamente den un periodo di 10 pa 15 aña.

E Sierra, cu ta conta cu 22 pico cubri cu sneeuw permanente y cu ta considera e glaciar mas grandi di e pais, tin su dianan conta. E tabata perdiendo su volumen pa motibo di aumento progresivo di e temperatura di planeta y otro factor provoca pa actividadnan humano cu ta genera contaminacion. E ta ser considera un fenomeno irreversibel.

Como 18.000 aña pasa e glaciar tabata cubri e seronan di e cordillera oriental, desde e lago di Tota te na e planonan bandona di region di Norte de Santander y un parti chikito di Venezuela, cu un extension di 17.000 kilometro.

Cu e desekilibrio climatico reciente, e glaciar a keda reduci na 1978 na 38,67 kilometro cuadra; na 1991 na 35 kilometro; na 1997 na 23 kilometro, y actualmente ta keda solamente 22,9 kilometro cuadra. Den menos di cuarenta aña e area cubri a reduci cu 59%. Tur esaki no ta preocupacion di cientificonan so, sino tambe di e poblacion indigena di e region cu ta perdiendo rapidamente nan habitat tradicional. No ta trata solamente di e desaparicion di e capa di sneeuw permanente, sino tambe e cambio pa e vegetacion den e zona mas abao, cu pa siglonan tabata e luga di biba di e hendenan aki. Varios video riba youtube ta duna un bon impresion di e situacion actual (search riba: Sierra del Cocuy).