Cambio di clima ta acelera e proceso di smelt di ijs

Greenland ta perdiendo ijs shete biaha mas lihe cu na 1990. E evaluacion ta yega di un ekipo internacional di cientifico polar cu a revisa tur observacion satelital durante un periodo di 26 aña.

Nan ta bisa cu contribucion di e pais na aumento di nivel di lama, actualmente ta siguiendo locual tabata considera un proyeccion pesimista di futuro. Esey ta nifica cu por spera un aumento di 7cm di elevacion di ocean pa fin di siglo, solamente for di Greenland.

Un menasa cu ta pone miyones di persona den region di costa den riesgo di inundacion. “Si tormenta yega, contra un linea di lama halto, lo kibra defensa contra inundacion”, profesor Andy Shepherd, di universidad de Leeds a bisa.

“E formula simpel ta cu rond di e planeta, 6 miyon di persona lo haya nan mes den situacion di inundacion pa cada centimeter di aumento di nivel di lama. Ora bo tende tocante aumento di un centimeter, e tin impacto”, el a bisa BBC News.

E grupo a analisa di nobo dato di 11 mision di satelite realisa na 1992 y 2018. E astronave aki a tuma varios medida di cambio den e diki, fluho y gravedad di e capa di ijs. Ekipo di Imbie a combina nan observacion cu nan ultimo modelo meteorologico y climatico. Locual ta resulta ta e imagen mas compresivo te awo di con Greenland ta reaccionando na e keintamento rapido di Artico.

Evalucacion di Imbie ta mustra cu e isla a perde 3.8 biyon ton di ijs den ocean for di cuminsamento di e estudio. Dr. Ruth Mottram, miembro di Imbie, ta afilia cu instituto meteorologico Danes. E ta bisa cu Greenland ta perde ijs di dos manera principal.

E prome ta pa e smelt di superficie y e awa ta huy te yega ocean. E di dos ta pa parti di iceberg y despues smelt na unda e ijs ta den contacto cu ocean. E contribucion a largo plaso di e dos proceso ta mas o menos mita y mita.

Den un aña, Greenland ta libera 250 biyon di ton di ijs. E aña aki ta excepcional pa cu calor. Den e ciudad di costa di Ilulissat, temperatura a yega 20 grado Celsius. Y hasta e interior di e capa di ijs, na su punto mas halto, temperatura a yega na cero. “E perdida di ijs e aña tabata mas di 370 biyon di tonelada”, Mottram a bisa.