“E statuto nobo ta bisa nan kier cumpra tereno, pero pa e parke en general bo no ta wak eyden kico nan lo sigui haci pe. Cual pa mi cu tin añanan trahando aki ta loke ta mas importante. Hende mester corda cu na cierto punto no tabatin caya mes pa yega e parke. Nos a yega leu pero nos no mester stop.”
Ayera mainta empleadonan di Parke Nacional Arikok tabata tin un welga pa motibo di preocupacion pa e forma di opera di directiva di e parke. E conflictonan cu segun algun empleadonan a conta nos ta andando pa algun tempo a culmina ayera mainta ora minister encarga cu medio ambiente Otmar Oduber (POR) a yega oficinanan di e parke na San Fuego unda sindicato di trahadonan di Arikok TOPA tambe a presenta.
Ey e minister a duna oido na e preocupacionnan cu e trahadonan tin, cual ta principalmente encera nan desacuerdo cu e statuto nobo cu a drenta december ultimo. Sr. Oduber tambe a sinta cu directiva di e parke. Den un declaracion pa prensa despues di sinta cu e directiva di e parke sr. Oduber a conta Bon Dia cu el a bay atende cu e problema pasobra entre otro a cambia e statutonan di e fundacion di manera inespera pa gobierno. “Bo mester pone gobierno na altura y tene bon contact entre otro”. Segun e minister, na ningun momento e directiva a indica cu lo a bay cambia statuto di e fundacion ni cu a cambi’e caba.
Riba e conflicto cu tin entre e trahadonan y e directiva e trahado, Yen Eckmeyer a conta un poco mas. Segun sr. Eckmeyer kende tin 17 aña trahando pa e parke, tin varios aspecto di e cambiamento di statuto cu ‘no ta cay den bon tera cu e trahadonan’. E ta splica cu e trahadonan a tuma nota cu e directiva a bay tras di lomba di minister pa cambia e statutonan. Pues nan a bay reuni cu minister.
Pa e trahadonan e manera con e directiva di e fundacion encarga cu 20% di e tera na Aruba por ‘haci y deshaci’ no ta corecto. Esaki mirando cu normalmente un fundacion ta structura di tal manera cu tin un directiva cu ta maneha e fundacion y den caso aki Arikok, mientras un director ta dirigi e fundacion, sr. Eckmeyer ta splica. Ademas di esaki den terminonan practico e trahadonan ta mirando cu pa pidi pa cualkier material ta tarda demasiado, cual ta haci e trabou di nan tarda mas pa via di e burocracia cual nan mester pasa den dje pa ‘haya cualkier saco di cement’.
Cambio den statuto
Un di e cambionan grandi cu a bin den e statutonan ta cu e parke ta dirigi nan mes den direccion di obtencion di terenonan cu lo por bira parti di Parke Nacional. Esaki ta manera nos a yega di publica den un edicion di Bondia anteriormente, sr. Oduber ta haya como un responsabilidad mucho grandi sin pasa consulta cu gobierno, ‘mirando cu e fundacion ta ricibi subsidio di 2.7 miyon florin’.
Manera sr. Oduber a declara na prensa, e no por bay asina leu di mete den un fundacion manera esun cu ta maneha e parke. Sinembargo el a declara cu e por bin na e conclusion cu e no por traha hunto cu e fundacion aki si nan no keda den contacto cu e minister. “Mi por yega asina leu pa bay parlamento di Aruba y bin cu un fundacion nobo cu si lo por traha conhuntamente cu e gabinete. Pero mi ta spera cu nos no mester yega asina leu.”
E minister a informa gobernador y tambe parlamentarionan conhuntamente cu otro preguntanan haci na parlamentario den cuadro di tratamento di presupuesto pa loke ta trata loke ta pasando na e parke. “E sintimento general ta coincidi cu esaki. No por ta asina cu e fundacion aki tin un tarea, esta maneha e parke pa gobierno, y djey e ta haya mas tarea cu esey sin consulta gobierno.”
E vocero di e parke mientrastanto a indica cu nan ta haya cu e maneho di e parke a bay atras despues di añanan, cual ta inclui e edificionan cu e parke ta maneha. “E statuto nobo ta bisa nan kier cumpra tereno, pero pa e parke en general bo no ta wak eyden kico nan lo sigui haci pe. Cual pa mi cu tin añanan aki ta loke ta mas importante. Hende mester corda cu na cierto punto no tabatin caya mes pa yega e parke. Nos a yega leu pero nos no mester stop.”
