Siman pasa un grupo di trahado di Post Aruba a subi caya un rato pa protesta contra e maneho di gerencia. Nan no ta contento cu e progreso y no mira cu e compania cu pa hopi añanan ta den problema, drechando. Awor gerencia ta comenta cu nan ta transformando pero cu esey tambe ta rekeri ‘compromiso serio di tur trahado’.

Guillermo Raymond, director di Post Aruba ta splica cu nan ta cambiando den un servicio di entrega carta pa entrega paki. “Si antes tur compania tabata manda carta, recibo, statement y mucho mas via Post, cu tecnologia moderno, tur cos a bira digital. Nos no por keda man crusa y mira e mercado bay laga nos. Post tin un vision nobo caminda nos ta bay restructura y reestablece nos mes riba mercado. Esaki ta trece cu ne cu Post mester re-inventa, innova y transforma nos servicionan di un forma integral, unda e enfoke ta pa adapta nos mes pa por acomoda e deseonan y exigencianan di nos clientenan. Esey ta precisamente locual mi ta haciendo.”

A consecuencia di tur tipo di tecnologia nobo, Post Aruba ‘ta directamente bou di hopi presion, no solamente local, pero tambe internacional pa keda bin cu otro servicionan cu ta produci entrada y ta den nan industria di servicio di entrega’. “Post lo bira un partner mas instrumental den busca y entrega paki na Aruba mes, como un forma di comodidad pa clientenan. Ya caba, mayoria entrega ta paki, aunke cu mayoria ta bini di afo”, asina e compania ta informa.

Bishita
Mester remarca ta cu pa basta aña directiva ta menciona esaki cu lo cambia di servicio y cu e compania ta den un situacion no mucho bon financieramente. Den ki tempo e compania e ora lo ta riba su pia bek, no ta conoci. Awor e gerencia ta indica cu algun luna pasa tabata na Aruba e Secretario General di Union Postal de las Americas, España y Portugal (UPAEP), Lic. Roberto Cavanna Merchan, pa reunionnan importante cu Post Aruba y cu Gobierno. E dirigente di e organisacion cu ta conta cu 28 pais miembro, a bisa cu Aruba ta tumando decisionnan importante pa cu modernisacion di servicio postal. Nan tin algun tempo caba trahando cu e director Guillermo Raymond y su personal riba varios aspecto pa eleva e nivel di servicio y agrega servicionan nobo y necesario.

Certificacion
Un di e proyectonan andando ta e certificado di siguridad postal, unda cu lo certifica Post Aruba dentro di poco como un di e paisnan cu tin e miho servicio y procedemento pa loke ta siguridad postal den e region. Den servicio di EMS tambe Aruba a conoce un adelanto enorme, segun directiva. “Post a subi di puesto 146 entre 192 pais te na puesto 40, cu ta confirma un servicio di un calidad halto. Tin otro proyectonan pendiente, incluyendo un reunion regional cu tayernan di nivel halto.”

“Nos semper tini oido pa tur nos empleadonan y portanan di gerencia semper ta habri. Gerencia tin un bon relacion cu SEPPA y a reuni cu nan den presencia di minister Richard Arends unda a aclaria varios inkietud, basa riba informacion incorecto”, segun e director. “Mi ta keda kere den e habilidad y sabiduria cu cada un empleado di Post tin pa por pone tur cos un banda y mira e retonan aki como un oportunidad unico pa sigui desaroya nan mes como expertonan den nan trabou mientras nos tur ta reconoce e temponan di aceleracion cu nos ta den.”