Dialuna atardi a tuma luga un ceremonia senciyo di ponemento di ofrenda floral riba plaza di 4 di Mei pa recorda e victimanan di II Guera Mundial.
E acto aki a conta cu presencia di Gobernador di Aruba, Alfonso Boekhoudt, Prome Minister di Aruba, Evelyn Wever-Croes y vice presidente di e organisacion di ex militarnan Camarada Aruba, Jacobo Henriquez. Gobernador a pone e ofrenda floral den presencia di Minister Presidente.
E ceremonia aki tambe ta den conexion cu e evento cu a tuma luga na Hulanda y otro partner den Reino. Nan ta den e mesun ora y tambe cu e bandera halfstok y ceremonia militar. Henriquez a bisa cu tur aña riba 4 di mei nan ta conmemora tur e victimanan di e conflicto mundial aki. Riba e plachi poni den e monumebnto ta para e nombernan di e victimanan militar y civil cu e conflicto mundial aki a laga atras na Aruba.
Vice-presidente di Camarada Aruba a declara na Bon Dia Aruba cu entre e nombernan ta aparece esunnan cu a muri victima di e atake cu torpedo haci pa un submarino Nazi. Sinembargo investigacion historico realisa pa Dufi Kock por a constata cu ta falta entre cinco pa seis nomber ariba e monumento. Camarada Aruba ta bezig pa trata di haya sa ken a traha e monumento y asina busca e forma pa pone e nomber di esnan cu ainda ta falta.
