Ya algun biaha, ciudadanonan ta confronta e situacion dificil unda nan ta bira victima di hortamento. Mayoria di caminda tin camara pa asina por tin un miho control y mayor seguridad, manera den sector turistico; sinembargo tin barionan cu cas cu ya caba ta dispone di un circuito di camara pa evita bira victima di ladron.
Esaki ta e caso di un pagina riba Facebook yama “Aruba contra Ladron” riba cual e administrado a dicidi di publica video di esnan cu nan ta considera “ladron” debi na e actitud cu nan por a mustra riba video.
Recientemente, a publica potret di un homber bisti cu T-shirt preto y pechi, canando pia abao cu tas kibra unda por mira cu e ta cana den bario y ta busca “algo pa haci.”
Den e comentarionan a pone diferente video di e persona aki cu ta parce a drenta un cas cu pool, ta cana y wak rond di e cas unda tambe por mira cu e ta purba di habri un porta.
Ta parce straño pero no ta un bes so el a yega di drenta den e mesun cas unda tambe por mira den otro potretnan, e mesun persona pero cu otro paña y cu keds bisti, purbando di habri e porta di e cas.
Mesora usuarionan di rednan social a cuminsa bati alarma y tag Cuerpo di Polis, minister di Husticia Rocco Tjon y hasta parlamentarionan debi na e preocupacion cu esaki ta causa pa habitantenan di e bario aki.
Algun di e comentario di usuarionan a sigura cu ta trata di un “choller” cu algun usuario a yega di wak’e na Playa of na Paradera segun a sigura.
Cierto ta cu camaranan di seguridad ta yuda hopi den casonan aki, vooral den bisindarionan mas luhoso unda algun casnan no tin cura y hendenan por drenta, aunke tin camaranan cu ta graba tur cos.
E video aki a ser graba den bario di San Migel y Koyari segun e publicacion mes ta señala.
