Prome minister Evelyn Wever-Croes (MEP) a anuncia durante un conferencia di prensa cu e instituto di camara di integridad cu nan ta lanta, lo coopera tambe cu Corsou y Boneiro.
Mirando cu e desaroyo riba e tema aki ta hopi mas desaroya na Corsou, e sistema cu lo wordo lanta lo tuma hopi inspiracion di e manera con Corsou a implementa esaki. Pero e colaboracion no solamente lo ta basa riba inspiracion, pasobra segun prome minister lo bay percura pa e camaranan di integridad colabora pa investigacionnan unda por ehempel Corsou lo investiga na Aruba pa cierto casonan y vice versa.
“Di e manera aki nos por percura pa e personanan nombra den camara di integridad no trata casonan di famia cu lo ta dificil pa trata.”
E mandatario a subraya un bes mas cu na Aruba e cultura di duna ‘fabor’ na otro specialmente den un posicion den gobierno ta comun. “Hopi biaha hende ta pidi pa saca e papel di ful abou den e stapel pa e wordo trata mas lihe. No ta nada malo pa kier yuda bo bisiña pero nos mester ta consciente cu tin reglanan y e reglanan aki mester wordo respeta.”
