Den un prome articulo tocante e fenomeno di uzo di e modelo di Public Private Partnership na Aruba nos a elabora riba e proposito y structura di un proyecto ‘PPP’. Den e articulo aki nos lo enfoca riba e experiencia cu proyecto PPP den region di Caribe y na Europa, como comparacion pa e experiencia na Aruba te na e momento aki.
Experiencia cu PPP den Caribe
Den Caribe tin varios pais cu bastante experiencia cu PPP, manera Jamaica y Trinidad & Tobago. Tambe Republica Dominicana, cu por cierto ta saliendo for di uza PPP pa motibonan di experiencia menos positivo. Un informacion di Public-Private Infrastructure Advisory Facility (PPIAF) di 2014 traha pa World Bank Group riba e experiencia den Caribe ta resumi e experiencianan señalando algun conclusion bastante util. A compara Jamaica y Trinidad & Tobago, Republica Dominicana, Surinam, Haiti y estadonan di ‘Eastern Caribbean’ riba diferente tema cual ta: politica explicito pa cu PPP, legislacion special, liñanan di guia detaya, rolnan defini den PPP, unidad di trabao gubernamental dedica na PPP, directorado cu experiencia di PPP, y financiamento dedica pa PPP.
Entre otro ta constata cu mayoria di pais a cuminsa cu PPP sin cu tin un framework special pa esaki y te awor no tin tampoco. Algun pais a bin ripara cu lo ta miho pa crea un ‘policy framework’ special pa PPP y dos a haci esaki: Jamaica y Trinidad & Tobago. E dos paisnan aki ta e uniconan cu tin tambe ekipo forma, specialisa den PPP, cu tin cierto experiencia acumula cu PPP. Fuera di esey, ningun pais ainda tin legislacion special y mayoria no tin ningun di e temanan menciona.
Por bisa cu, a pesar cu ta traha cu e concepto di PPP pa basta aña caba, casi den ningun pais a yega na desaroya instrumento institucionalisa pa PPP. Pa e paisnan chikito, manera esunnan di Eastern Caribbean, e pregunta ta tambe si ta util y rendabel pa inverti den structura dedica na PPP, si e ‘scope’ y frecuencia di uzo di PPP no ta asina grandi. Otro punto cu no ta ser trata den e estudio aki ta e experiencia cu e ‘capacidad di carga’ financiero di e partner publico pa cu PPP, banda di su otro obligacionnan financiero. Esaki specialmente pasobra e experiencia ta cu PPP ta surgi hopi biaha como alternativa pa financiamento na momento cu via otro canal ya financiamento di banda publico a bira mas dificil. Pa loke ta e caso di Aruba nos lo bolbe riba e punto aki despues.
Experiencia cu PPP na Europa; compara cu Aruba
Den un rapport di European Investment Bank (2009) ta duna un resumen bastante completo di e experiencia Europeo cu proyecto PPP, cu a ser financia pa EIB. Den cada punto nos ta inclui di biaha e experiencia na Aruba, asina leu cu esaki ta disponibel. E conclusionnan principal ta resumi di e siguiente forma, cu e parti den ‘Bold’ di e analisis di EIB:
Seleccion di proyecto ta clave (selecta proyecto cu ta ‘fit’ miho cu e modelo di PPP). Na Aruba ta trata mayoritariamente obra di infrastructura, manera den otro pais tambe. Esaki ta independiente di e opinion riba e necesidad/urgencia di e obra for di punto di bista di prioridad. No ta trata tampoco di obra asina grandi o complica cu e no ta cumpli cu e criterio ey;
Sector publico su capacidadnan pa adkisicion y negociacion mester ta fuerte. No ta sigur cu gobernacion tin tur e experticio den cas pa atende tur proyecto. Esaki ta implica contrata experticio externo, loke ta resulta semper un costo adicional considerabel. Mester evalua si e tamaño di e obra ta hustifica ehecucion como PPP, mirando e costonan extra di experticio. Tambe experticio ta necesario pa acompaña henter e proceso te na final ora cu gobierno mes lo asumi responsabilidad pa mantene e obra. Ta importante anto cu e partner gubernamental tin conocemento specifico, a pesar di a contrata experticio exterior. Un opcion ta pa contrata experto cu ta transferi e conocemento necesario pa e tecniconan local;
PPP ta funciona miho ora e proceso di adkisicion ta transparente y competitivo. Transparencia optimal ta keda un cuestion di opinion. Ta asina cu a duna cierto informacion general na publico. Busca y haya informacion adicional no den tur caso ta resulta facil. A crea un website pa algun proyecto cu informacion general, pero cu no ta duna informacion p.e. acerca di costo financiero, forma di financiamento, etc.;
PPP ta mas adecua pa sectornan unda e ritmo di cambio ta gradual. Den e caso di Aruba ta trata mayoritariamente obra di infrastructura, cu den otro pais tambe ta enfoca den mayoria di caso. E sectornan selecta na Aruba ta considera di cambio gradual. No tin proyecto den por ehemplo IT/ICT unda tecnologia ta cambia rapido haciendo cierto decision mustra obsoleto poco tempo despues cu el a ser tuma. Ta consehabel pa den futuro mantene esaki asina;
Introduci legislacion pa PPP por ta importante, pero riba su mes no ta un pre rekisito suficiente pa PPP exitoso. No a scoge na Aruba pa introduci legislacion specifico pa PPP; ta traha cu leynan manera nan ta pa loke ta responsabilidad civil, derecho encuanto contracto, y legislacion vigente pa construccion, etc. Te awor no a surgi ningun discusion tocante e necesidad aki tampoco; tambe den e otro paisnan di Caribe no a opta pa esaki;
PPP exitoso ta envolve transferencia di riesgo significativo, pero realistico. Den e proyectonan ehecuta te awor no tabatin problema conoci di transferencia di riesgo. Ta dificil evalua e aspecto aki sin acceso na e detayenan tecnico di e convenionan;
Pa motibo di costo di transaccion parcialmente fiho, ta existi un tamaño minimo pa PPP viabel di alrededor di €25 miyon. Ta dificil pa bisa na Aruba kico lo ta e suma limite, bao di cual no mester opta pa PPP. En todo caso e mayoria di e obranan actual ta cay den e bracket riba ekivalente di €25 miyon estableci aki pa e situacion Europeo;
Cierto proyecto simplemente ta demasiado grandi y/o complica pa adkiri como PPP. Na Aruba no tin caso di proyecto cu ta parce demasiado complica pa ehecuta den PPP. Esaki mas tanto ta obranan grandi di diferente fase cu diferente partner, unda ‘liabilities’ ta bira hopi complica pa motibo di dependencia di un fase di ehecucion riba otro, cu diferente partner;
Maneho pa e promotor di PPP mester ta enfoca semper riba ‘value for money’ y no enfoca exclusivamente riba e prijs mas abao. Na Aruba den varios caso no a scoge pa e bidder mas abao. Esaki por indica cu corectamente a aplica aki e principio di ‘value for money’, en bes di scoge esun mas barata sin mas. Sin embargo, sin acceso na informacion adicional esey ta dificil pa evalua, tambe mirando e situacion di inclusion di trabao extra despues di a scoge partner (caso sala di operacion na proyecto expansion di hospital);
Entidadnan cu ta envolvi den realisa e obra no mester perde e capacidad pa por ‘afford’ e proyecto for di bista, tanto pa gobierno como pa e usuario, ora ta considera proyectonan PPP. Esaki ta un evaluacion cu asina leu cu ta conoci, no a ser haci ainda den e casonan di PPP na Aruba;
PPP no ta traha den tur sector (por ehemplo den IT/ICT unda condicionnan ta cambia rapidamente). Te awor na Aruba a entama PPP den sectornan cu ta apto pa PPP manera obra di construccion y caretera. Den ambos caso ta trata di proyecto cu un meta fiho bon defini, cu den otro paisnan tambe ta e sectornan den cual mayoria di proyecto ta categorisa. Esaki no ta un garantia cu den futuro no por planifica proyecto den sector menos apto;
Promotornan mester keda alerta pa e hecho cu por duna proyecto cu ta cla pa ehecuta prioridad riba otro proyecto di infrastructura cu talbes ta mas necesario. Te awor por bisa cu esey no ta parce e caso den e escogencia di proyecto, ya cu tur proyecto tabatin un periodo di preparacion bastante largo, y no tabatin proyecto cla pa ehecuta cu a bay prome. Loke si ta e caso cu tin discusion riba utilidad riba su mes di cierto proyecto. Esaki por ehemplo ta e caso di e ‘Green Corridor’ unda por tin debate si e ampliacion di solamente un parti di e trayecto Oranjestad – San Nicolas tin tanto efecto positivo riba fluho di trafico, en bista tambe di e costo halto di e proyecto (‘value for money’).
Den e articulo aki a trata e aspectonan mas importante relaciona cu proyecto PPP. Den un siguiente y ultimo articulo lo duna e conclusion final y tambe e recomendacionnan al caso pa loke ta PPP na Aruba. Den esey lo elabora mas riba e aspecto di ‘capacidad di carga’ di Aruba, loke no ta conta solamente pa proyecto di PPP, pero en general pa inversion gubernamental directo o indirecto cu ta significa un peso extra riba recurso financiero gubernamental.
