Si logra cu Minister di Economia bay de acuerdo cu aumento di e pago pa registra negoshi, lo por elimina e cobranza pa por haya acceso digital di e registro di Camara di Comercio. Asina Presidente di Camara di Comercio Diederik Kemmerling y Director Martijn Balkestein a bisa e siman aki. Y e combersacionnan a inicia caba, Minister Demisionario Geoffrey Wever a confirma.

E tema di pago pa acceso ta keda uno cu hopi den comunidad ta critica, pero asina mes, ya caba tanto banconan, oficinanan di abogado y hasta departamentonan di Gobierno cu mester di informacion ta haciendo uso di e servicio di abono, cu ta permiti acceso na e registro.

“Nos tambe lo kier pa e registro ta accesible pa tur hende na forma digital y si por gratis. Sinembargo, nos tin e gasto di entre 350 pa 400 mil florin cu mester paga anualmente, pa sostene henter e sistema automatisa di Camara di Comercio, cu ta inclui tur tipo di seguridad,” segun Balkestein. “Ta fondonan cu nos no por genera a base di locual negoshinan ta paga pa ta registra.” Riba dje, a pesar di inflacion, Camara di Comercio no a subi su cobranza pa registro for di 2009, cu ta nifica ta absorbando mas di 20 porciento di aumento di gasto.

E deseo ta pa por habri e sistema den futuro. Sea mester institui e cobranza of descontinua e sistema digital, Balkestein a enfatisa, “cu ta basa riba servicio di diferente proveedor, di Hulanda y Aruba. Ademas, Camara di Comercio no ta ricibi subsidio di Gobierno y ta depende di dos fuente so pa su entrada, cu ta e contribucion anual di companianan y e resumennan cu ta genera como 360 mil pa aňa.” Por cierto, a nota un falta di diligencia den pago di e contribucion di negoshinan cu ta trece mas gasto.

For di 2022 ta tratando pa haya luz berde di Minister Geoffrey Wever pa por hisa e contribucion di negoshinan, algo cu e Minister a keda rechasa regularmente. Riba dje, Camara di Comercio tabata trahando cu un ley bieu cu finalmente a keda adapta, sinembargo sin e areglo financiero nobo. “Dado momento mester realisa cu sea ta cobra pa e servicio digital of stop cune completamente.”

E ley cu ta dirigi Camara di Comercio ta papia cu e instituto mester percura cu su clientenan por haya acceso na informacion y no cu mester duna acceso digital. “Te ainda por acudi na Camara di Comercio pa haya informacion y esaki ta keda gratis.” E registro di accion y di ken ta e UBO (ultimate beneficiary owner) si ta keda for di bista publico.

Transparencia

Tanto Kemmerling y Balkestein ta bisa di ta kere den transparencia y e speranza ta cu por bolbe habri e sistema na forma gratis pa comunidad. Segun ambos, Minister Wever tambe ta pensa mescos y den principio a bay de acuerdo pa cambionan, “pero e ta demisionario. Nos ta kere cu pa 2025 lo por logra y facilita informacion na comunidad,” Balkestein a agrega. “Esey ta logico, pero ta importante pa realisa cu e ta costa.”

E intencion ta pa aumenta e contribucion di negoshinan cu 20 florin cu tabata den e proposicion di 2019 tempo cu a ahusta e ley. “Y asina mes nos ta keda mas barata cu otro islanan Hulandes den Caribe,” e Director di Camara di Comercio ta insisti, kende a bisa cu kier delibera cu Minister pa alinea mihor e gasto pa e diferente construccion huridico di empresanan. “Un VBA por ehempel ta costa poco pa keda estableci y ta paga menos na contribucion na Camara di Comercio compara cu un NV. Antes nos tabatin mas NV, y awor sea tin mas VBA of negoshi di un persona (eenmansbedrijf) cu hunto ta practicamente 98 porciento di negoshinan nobo. Pues mayoria ta paga e suma mas abou posible na contribucion cu ta haci e situacion hopi mas dificil pa sostene.” E proposicion ta pa bin un sistema manera na Hulanda y Boneiro, unda tin un asina yama ‘flex rate’ basa riba e structura huridico di un negoshi, pa elimina e discusion riba capital cu a hinca den e empresa. Esaki ta nifica tambe cu e nivel di contribucion lo ta basa riba e cantidad di hora di servicio cu trahadonan di Camara di Comercio ta dedica na establecimento di empresanan individual. “E prijs mester refleha e cantidad di trabou di Camara di Comercio,” Balkestein ta kere.

Cobranza ta legal

Diederik Kemmerlink a bisa cu e paso pa cobra pa acceso digital na e registro no ta algo cu Directiva di Camara di Comercio ta contento cu n’e, pasobra “berdad tin hopi gasto caba pa haci negoshi na Aruba. Y pero esaki ta un necesidad pa cubri gasto y proteha finanzas saludabel di e instituto. Camara di Comercio no ta traha a base di ganashi, pero nos kier cubri nos gastonan si.” Tanto e Presidente como Director ta enfatisa cu e ley actual ta brinda espacio pa por cobra pa uso di infrastructura.

Y awor cu Minister a mustra disponibilidad pa acorda aumento di e contribucion, e probabilidad ta grandi cu pa 2025, un biaha mas comunidad lo tin acceso liber na e registro digital di Camara di Comercio. “Di otro banda, e servicio di abono ta brinda mas informacion cu locual normalmente ta riba e registro publico,” Balkestein a agrega.