E carta cu e asociacion di hotelnan y turismo di nos pais, AHATA, a firma un carta hunto cu ATIA y Camara di Comercio y a entreg’e na Minister Otmar Oduber den cual nan ta sugeri pa bini cu un “cooling off period” di 12 luna pa por investiga e desaroyonan rond di e forma di cobra huesped nan di hotel, conoci como “All Inclusive”.
Sinembargo, despues di e carta e mandatario a reuni cu tanto Camara di Comercio como ATIA den cual el a pidi nan pa retira nan sosten na e carta di AHATA. Ambos organisacion a bay den nan seno y ningun di dos a haci esey, al contrario, Camara di Comercio a bolbe manda un carta reconfirmando nan sosten na e asociacion di turismo.
Cu esey e gremionan comercial ta uni den manda un mensahe na Gobierno y na Parlamento, pa revisa e ley aki miho, pa nos ta sigur cu ta tene cuenta cu aspectonan cu tin di haber cu turismo di Aruba y no di otro pais cu tin otro condicionnan y otro forma di haci negoshi.
