Den cuadro di e laso comercial entre Aruba y Venezuela a wordo anuncia un camara bi-nacional di cual Camara di Comercio di Aruba (KvK) , no sa nada di dje. Sinembargo luna pasa a bin un mision comercial for di Venezuela pa estrecha e lasonan comercial cu nos isla.
Presidente di KvK , Sra. Daphne Lejuez, a bisa cu pa e ta “totalmente honesto como Camara di Comercio nos mes no a wordo acerca. Nos no ta envolvi y nos no sa niun informacion tocante esaki”.
E ta kere cu probablemente esaki ta algo cu di parti di Venezuela y di su Camara di Comercio ta algo cu nan a bisa cu ta discutiendo cu gobierno. Pero nan como Camara di Comercio di Aruba, nan no ta na haltura di esaki.
Ferry
Igualmente sra. Lejuez a referi na e topico di un ferry cu supuestamente lo cubri e ruta entre Venezuela y Aruba, y tambe ta inclui otro islanan di nos reino Hulandes. El a bisa cu KvK lo desea cu lo tin un aclaracion riba e situacion di ferry, ya cu e topico aki a wordo menciona durante e acto oficial di reapertura di refineria na San Nicolas, opera pa Citgo.
El a bisa cu KvK a haci e pregunta varios biaha na Gobierno riba e operacion di e ferry aki dor di compania Venezolano, pero nan a haya semper como contesta cu esaki no ta bay tuma luga. “Diferente departamento encarga cu esaki a keda bisa cu e no lo tuma luga. Pero sinembargo e partido Venezolano a keda bisa cu si ta e caso”, el a bisa.
Mirando cu no tin claridad ainda riba e asunto di e ferry Venezolano, si e lo bin of no na Aruba, KvK lo desea di haya mas informacion riba esaki di parti di gobierno di Aruba.
