Presidente di Camara di Comercio y Industria di Aruba (KvK), Sra. Daphne Agius Cesareo-Lejuez tabata basta prudente pa emiti su opinion riba e ultimo desaroyo cu ta tumando luga riba nos isla, specialmente riba minister Otmar Oduber su eventual renuncia y reapertura di refineria na San Nicolas.
El a bisa cu e decision aki di e mandatario lo bay trece diferente cambio cun’e. Pa tal motibo como gremio comercial nan mester keda pendiente di kico e decision ta bay trece cun’e, esaki den caso tal cu e mandatario ta entrega su carteranan. Pero tambe nan lo keda pendiente kico esaki lo nifica pa e diferente segmentonan den comercio cu e mandatario ta representa.
2016: contesta y claridad
Igualmente e recien reeligi presidente di KvK a laga sa cu pa 2016 nan ta spera di por haya contesta ta diferente preguntanan formula durante 2015, y cu ainda nan no a haya contesta.
“Nos ta sperando den e prome kwartaal pa tin mas claridad riba kico lo por spera … kico ta bay pasa fei e sistema fiscal pasobra nos sa cu esey ta keda pendiente”, el a declara durante un conferencia di prensa ayera mainta. Tambe el a laga sa cu nan tin pendiente diferente reunion na nivel di gobierno cu nan ta spera cu denter di pronto tin mas contesta compara cu reunionnan anterior.
Refineria
Encuanto e reapertura di e refineria, presidente di KvK a bisa cu nan ta prefera di warda riba e plan definitivo di e proceso aki, con e lo bay habri y kico e ta bay representa pa nos pais. Igualmente cual companianan ta esun cu ta bay expande y kico ta nifica pa San Nicolas mes. Tambe su e reapertura lo ta algo na termino largo of corto.
“Mi ta kere cu tur hende ta pendiente pa wak den siman ultimo y kico e ta bay representa pa Aruba”, el a declara. E ta kere cu sigur e lo bay trece na termino corto un desaroyo positivo, pero mester bay wak kico e ta bay representa na termino largo. Pues e ta haya cu tur cos ta depende con e refineria ta habri bek y kico e reapertura aki ta nifica ya sea riba tereno laboral, actividad comercial cerca e negoshinan cu ta bay sostene e proceso aki. “Tur hende ta na spera pa tin e concretisacion di e contracto aki pa wak kico ta nifica prome cu nan sigui haci inversion. Mi ta kere cu tin hopi hende den spera igual”, segun presidente di KvK.
Encuanto si Camara di Comercio (KvK) a cambia su posicion na fabor di e no reapertura di e refineria y fortalece of explora otro sector di nos economia, Sra. Cesareo-Lejuez a bisa cu nan no a desvia “necesariamente” di nan posicion inicial.
Como KvK nan ta kier wak un desaroyo duradero considerando cu cada bes e refineria ta habri y cera. Pa e motibo ey KvK su posicion ta pa busca un desaroyo positivo y mas duradero. “Mirando tambe e ambicion di gobierno pa busca algo mas renobabel y sostenibel”, el a bisa.
