Mirando cu Aruba ta den un crisis profundo, Camara di Comercio y Industria (KvK) a emiti un recado di prensa urgente den cual ta describi e pasonan cu e organisacion ta kere cu ta necesario pa atende e problema di empleo den sector priva:
- Empresarionan mester haci tur nan posible pa mantene nan empleadonan riba payroll;
- Gobierno mester apoya empresarionan haciendo esaki;
- Gobierno mester corta nan salarionan y duna e placa back na empresarionan pa paga nan empleadonan di sector priva cu e placa aki;
- Servicio di Elmar/WEB/Setar mester ta disponible liber di gasto, no posterga, LIBER, te proximo aviso;
- Tur impuesto cu mester paga no mester keda posterga, sino excento inmediatamente, asina cu empresarionan por paga e empleadonan riba nan payroll (tene e cash moviendo), te proximo aviso;
- Gobierno mester traha duro pa haya un inyeccion di capital pa e suma cu Aruba mester pa tene economia na bida por lo menos te fin di aña, calcula a base di luna pa luna;
- E inyeccion menciona na punto 6 mester bay pa e empresarionan pa nan por paga nan empleadonan y no na gasto di payroll di gobierno.
E organisacion ta termina bisando cu nan ta sinti cu gobierno ta haciendo su best pa yuda mas tanto posible, sin embargo ta comprende di e registradonan di Camara di Comercio cu loke a presenta aki ta nan preocupacion mayor. “Tin, o lo tin 50.000 persona sin trabao riba caya na Aruba cu mester ayudo y e hendenan ey, nos hendenan, mester ayudo rapidamente,” e organisacion ta bisa, y ta termina bisando cu e organisacion ta dispuesto pa yuda y duna input unda ta necesario.
