Diahuebs atardi a tuma luga un conferencia di prensa di Camacuri Harley Davidson Club Aruba durante cual presidente di e club, Buchi Croes, a anuncia e actividadnan cu lo tin relaciona cu nan bike ride mas grandi celebrando dia di Himno y Bandera otro aña.
Sr. Croes a splica cu normalmente nan tin nan conferencia di prensa pa esaki dia 8 di maart, pero e biaha aki nan a trece pa dilanti prome pasobra na cuminsamento di aña tin hopi actividad, manera carnaval y ora 8 di maart yega hopi hende no ta na altura y nan ta druk cu otro cosnan y mester trece pa dilanti hopi bon hinca den otro pa informa e hendenan di e evento di bikers despues cu nan a pasa den carnaval.
E aña aki Camacuri Harley Davidson Club Aruba a cumpli 25 aña, 5 lustro, pero segun Croes ta remarca, esaki a bay hopi keto pa motibo cu ainda tabatin control y casonan di Covid na isla. El a splica cu el a reuni cu minister Tjon pa permiso pa e celebracion aki y minister a informa nan cu nan lo haya e permiso pa nan celebracion, pero na mesun momento el a pidi pa no haci ningun propaganda ariba Facebook y warda te ora e casonan baha.
“Ora cu nos a haya e green light e tabata francamente un siman prome cu e evento y p’esey mi ta bisa el a bay hopi keto. Pero e aña aki cu ta bin ta 26 aña, ami ta bisa cinco lustro+, y nos a bisa nos ta cuminsa na trece un conferencia di prensa prome cu aña cambia pa nos bisa Aruba completo pa prepara pa otro aña, na tur e bikernan, tur e clubnan cu semper ta participa tanto di Aruba como di afo”, Croes a indica.
Croes a remarca cu e actividadnan pa 18 di maart ta cuminsa normalmente dia 8 di maart cu e conferencia di prensa oficial caminda nan lo revela e schedule oficial. E schedule menciona awe ta uno tentativo pa duna un bista di kico mas o menos lo ta tuma luga.
Ta cuminsa diaranson 15 di maart cu unloading di e containernan cu ta trece e bikenan di Corsou, Boneiro y Surinam tambe lo bin pa participa. Coredonan di Surinam a yega di bin caba, pero nan a bin sin nan brommernan y nan ta huur of presta aki mes na Aruba, pero e biaha aki nan lo trece un container cu bike di nan mes. Un grupo di Colombia tambe lo t’ey presente.
Diahuebs 16 di maart lo tin inscripcion oficial pa e evento di 18 di maart. Inscripcion lo tuma luga na Hooters.
Diabierna 17 di maart lo tin un night ride durante cual e club lo bishita algun luga rond di Aruba y lo termina na One bar. “Danki na One Bar pa ricibi nos den cas. Nos ta hopi contento cu nan a ricibi nos”, Croes a señala.
Diasabra 18 di maart lo tin e Crioyo Night na Camacuri Village. Lo tin coremento rond di Aruba y esaki lo caba na Camacuri Village na Boulevard caminda lo tin tentnan cu lo ta bendiendo diferente cosnan di Aruba, tanto souvenirs como cuminda crioyo.
Croes a splica cu durante dia, si tur cos bay bon, lo por tin un evento riba Palo Marga. El a sigui splica cu pa e weekend aki hopi bikers ta bin di Corsou y Boneiro y tin e bikernan di Aruba mes cu ta core riba caya y ta haci fever riba caya. Den pasado minister e tempo ey a hala nan atencion.
El a comenta cu si nan bay Palo Marga nan por organisa un evento pa nan y por tin premio pa pustamento, drifmento etc. y asina por evita e peliger cu esaki ta trece riba caya, no pa nan so si no pa e publico cu lo ta riba caminda tambe.
Diadomingo 19 di maart ta e dia oficial cu Camacuri Harley Davidson Club ta sali riba caya y ta core. Nan ta cuminsa semper cu un desayuno y despues nan ta sali cu e coremento y nan ta haci diferente weganan cu pa añas caba nan ta haci na diferente stop. Aworaki ainda no tin confirma e luga na unda esaki lo caba.
Croes a señala cu hopi biaha nan ta acerca Gobierno di Aruba y biaha aki nan a haya toch un ayudo di minister. “E aña aki nan a yuda nos cu algo y otro aña minister a bisa nan lo prepara miho. Ban spera cu esaki ta bay ta algo positivo”, el a agrega.
“Nos mester di yudansa pasobra e ta hopi gasto. Di berdad e ta hopi gasto y hopi trabou. No ta mi so ta haci esaki, pero mi tin un team, mi tin un directiva y tambe nos tin nos miembronan. Semper mi a bisa cu si bo no tin miembro bo no tin club. E miembronan ta duna bo motivacion pa sigui lucha y bay caminda bo kier yega”, Croes a resalta.
