Clima ‘tormentoso’ ta cay den gran parti di Europa, marcando un record nobo di temperatura na juni na Alemania y Republica Checo. E calor a obliga chauffeurnan pa baha velocidad na algun seccion di caminda conoci na Alemania.
Autoridad a pone pa limite di velocidad na algun caminda mirando e preocupacion di calor halto. Algun scol na Francia tambe a keda cera pa tuma preocupacion pa e clima di calor, mirando cu normalmente no tin temperatura asina cayente na Francia y nan no ta conta cu instalacion di airco.
Agencia di meteorologia di Alemania, Deutscher Wetterdienst, a bisa cu den lectura por mustra cu mercurio a yega 38.6 grado Celsius na Coschen, cerca di frontera cu Polonia. Esey ta un decimo di grado mas halto cu e record nacional anterior pa juni, cual tabata na 1947 den sur occidente di Alemania.
Autoridad a adverti cu temperatura por alcansa 40 grado Celsius na algun parti di Europa continental e siguiente dia, mientras un nubia di aire seco y cayente ta move for di nort Africa. Profesor Hannah Cloke, kende ta investiga situacion peligroso di naturalesa na Universidad di Reading na Inglatera, a bisa cu e calor y acumulacion di humedad ta un ‘combinacion cu potencial letal’
“Mucha, hende grandi y persona cu malesa ta esunnan cu ta core riesgo”, Cloke a bisa. Ta spera cu e condicion lo afecta gran parti di e pais. Tambe Spaña, Italia, y otro pais den Europa continental.
