(AP) – California, cual tin un economia cu ta mas grandi cu mayoria pais y unda mayoria di e innovacion den tecnologia mundial ta nace, riba diaranson a bira e prome estado cu formalmente a cuminsa cu examinacion pa adapta criptomoneda y e innovacionnan relaciona cu esaki.
Siguiendo e caminda cu e president Joe Biden a habri den maart, Gobernador Gavin Newsom a firma un orden ehecutivo pa e agencianan di estado cuminsa move conhuntamente cu e gobierno federal den creacion di regulacion pa monedanan digital. Tambe el a haci yamado na oficialnan pa cuminsa explora e incorporacion mas amplio di e “blockchain” den operacionnan gubernamental.
Desarrolla blockchain y tecnologia di criptomoneda ta “potencialmente un creador explosivo di companianan nobo y trabaonan nobo cu lo trece oportunidadnan nobo,” Dee Dee Myers, un consehero di Newsom y director di e Gobernador su oficina di Desaroyo di Negoshi y Economia.
“Pa asina nos por tin mas oportunidad,” el a bisa. “Tambe tin hopi cu te ainda nos no sa tocante e industria aki y esaki ta un otro motibo dicon nos kier involucra nos mes for di trempan.”
Newsom su ordo ta bisa cu e estado, cual ta cas di Silicon Valley y innovacion financiero manera PayPal y Square, mester ta dilanti den saca afo con por adapta e tecnologianan nobo aki.
“Hopi biaha nos ta mira cu gobierno ta keda atras ora ta trata di avanse tecnologico, pa e motibo aki nos kier keda dilanti di e curva, creando e fundeshi pa asina e negoshinan y consumidornan por disfruta di esaki,” Newsom a express.
California tin mas o menos 39 miyon residente y su economia ta mas di 1.3 treiyon dollar, cual ta mas grandi cu Reino Uni y India. Newsom a bisa cu su orden ta un paso dilanti den haci e nacion e prome estado cu “lo establece un ambiente regulatorio y di negoshi pa bienes digital cu ta comprensivo, cauteloso y den harmonia.”
