Mas di tres aña despues cu votadonan na California ampliamente a legalisa marihuana, un panel estatal ta considerando si su kimico potente cu ta duna e ‘high’ – THC – mester wordo declara un riesgo pa muhenan na estado y rekeri advertencia.
Estudionan a indica cu un cantidad aumentando di muhenan na estado ta uza productonan di marihuana pa alivio pa nausea mainta y dolor di cabes, maske su efectividad no ta apoya pa ciencia.
Oficialnan di industria di cannabis a bisa cu tin demasiado tiki investigacion disponibel riba THC pa sostene un accion asina, y ta adverti cu lo por converti companianan di marihuana den obhetivo di demandanan legal cu acusacionnan no verifica di lesion pa uzo di cannabis durante embaraso.
“Esey ta parce manera un cartera habri. Con nos ta defende nos mes?” segun doño di dispensario, Jerred Kiloh, kende ta lider di United Cannabis Business Association, un grupo di industria.
Abogadonan buscando placa facil lo bisa ‘duna nos $10mil of nos lo hiba bo den un caso largo na corte’, el a agrega.
California Cannabis Industry Association a echo e sentimento, notando cu e estado di cannabis como un droga ilegal na nivel federal a preveni investigacion di agencianan gubernamental. E estudionan aki ta necesario pa determina si THC ta representa un riesgo pa salud di muhenan na estado.
“Bon politica y proteccion pa consumidor ta basa riba hechonan y data”, segun vocero Josh Drayton a bisa.
E reunion ayera di e misterioso comite estatal, Developmental and Reproductive Toxicant Identificacion Committee na Sacramento lo enfoca riba e pregunta si THC ta causa ‘toxicidad reproductivo’. E panel ta consisti di cientificonan nombra pa gobernador.
Un hallazgo afirmativo lo haci THC un di centenares di kimico husga como causa di cancer of defectonan di nacemento cu e estado ta rekeri pa tin label di advertencia, manera arsenico y chumbo.
E revision ta bou di e ‘umbrella’ di e Safe Drinking Water and Toxic Enforcement Act, miho conoci como Proposicion 65. E ta rekeri label di advertencia pa kimiconan considera como peligroso, y ta permiti residentenan, gruponan defensor y abogadonan pa demanda den nomber di estado y colecta un porcion di e penalidadnan estatal si faya di duna advertencia.
Ley na 1986 ta credita cu elimina kimiconan cu ta causa cancer for di productonan, pero tambe culpa pa pone un escenario pa accion legal. Desde 2009, e estado ta lista huma di marihuana como conoci pa causa cancer, similar na huma di tabaco.
“E expansion di Proposicion 65 manera e ta relaciona na cannabis ta prematuro y falta tanto hechonan como e data cu lo hustifica e accion aki”, Drayton a bisa.
Surgeon General Mericano a adverti na augustus cu huma marihuana ta peligroso pa muhenan na estado y nan baby den desaroyo. Medicina convencional ta conseha contra uzo di marihuana durante embaraso pasobra tin estudionan cu ta sugeri cu por causa nacemento prematuro, peso abou, of otro problema di salud, pero cantidad di e estudionan aki tabata riba animal of nan hallazgo tabata habri pa disputa.
National Institute on Drug Abuse ta pagando pa varios estudio riba uzo di marihuana durante embaraso.
Si e panel na California ta declara cannabis un riesgo pa muhenan na estado, no ta cla kico e impacto inmediato lo ta riba e industria di marihuana legal den e estado.
Por asumi cu mester cambia e pakinan pa pone advertencia pa muhenan na estado. Pero rekerimentonan asina probablemente lo tuma pasonan adicional di agencianan cu ta supervisa regulacion y empake di marihuana.
Hasta productonan cu ta contene CBD, e ingrediente popular extrai di marihuana of hemp, por contene cantidad minimo di THC.
