Manera nos a publica, den november aña pasa Consehonan Electoral di region y Reino a bini hunto pa discuti algun punto di preocupacion y unda tur mester cuminsa introduci cambio of ahustacion. Un punto esencial cu a keda discuti ta cu si nos no para keto riba e importancia di kico un bon registro civil ta, ora di eleccion esaki ta bira hopi bisto segun presidente di Conseho Electoral di Aruba Glenn Thodé ta splica Bon Dia.
E proceso electoral di nos pais ta bisa cu ken tin e derecho di voto ta un hende cu tanto dia prome cu e dia di eleccion ta registra den e registro civil. Banda di esey, e persona mester tin e nacionalidad Hulandes y mester cumpli 18 aña pa e dia di eleccion. Esey kiermen cu e registro civil ta fundeshi pa bo derecho di voto y tambe determina si bo ta haya un carchi pa bo presenta cu ne dia di eleccion pa bo vota.
Si e data den e registro civil no ta corecto, cual ta contene hende cu no ta biba na Aruba y ta registra toch como cu e ta bibando na un adres na Aruba, e no ta exacto. Hendenan ta haya yamada pa bin vota cual conforme e ley nan no tin derecho di vota e momento ey. Anto e carchi di voto ey por ta lo wordo uza si miembro di famia por ehempel ta paga un pasashi pa e persona bin y haci uzo di dje of e persona mes bin Aruba pa vota.
Informacion incorecto den registro
Sr. Thodé: “E fayonan aki por influencia eleccion y resultado di eleccion.” E ta splica cu e ta posibel cu si bo no hinca e informacion corecto den e registro, of comete fayo y te hasta intencionalmente cambia datonan eyden, bo por haya un hende cu por ta no tin e nacionalidad Hulandes toch ta wordo registra manera cu nan ta Hulandes. Pues bo ta haya un persona cu en principio no tin derecho di vota ta haya un yamada sinembargo pa bin vota. “Djis uza bo fantasia y bo ta mira cu bo por haya diferente motibonan pa kico por bin un cambio asina den e registracion, sea di nacionalidad of dia cu bo ta registra na Aruba. Si un hende bula bin y registra despues di e cut off date en principio e no tin derecho di voto. Pero si e registra e dia cu nan presenta robes, un dia cu ta cay prome cu e cut off date diripiente e persona ey ta haya un yamada pa bin vota.”
Sr. Thodé ta splica cu tur esey ta incorecto conforme locual e ley ta describi cu ta duna bo fundeshi pa vota e dia ey.
Limpiesa di administracion civil na Corsou
Na Corsou durante e conferencia aña pasa entre e Consehonan Electoral regional y di Reino, tabata tin momentonan hopi tenso entre Conseho Supremo Electoral eynan y gobierno. Pasobra e gobierno tambe tabata kier pa e bay un cierto manera y na Corsou nan tabata tin problema hopi mas serio cu nos tin den e limpiesa di e administracion civil segun sr. Thodé. Kiermen cu lo tabata tin hopi mas fayo den e administracion civil si bo compar’e cu esun di Aruba. Esey tambe lo bay duna un proceso electoral cu no ta completamente conforme e ley. Pues e Conseho Supremo Electoral na Corsou mester a haci hopi esfuerso, y pa e motibo aki el a haya hopi presion politico tambe, como tambe e Burger Zaken pa no haci e database limpi.
Sr. Thodé ta elabora: “Pasobra asina toch bo ta haya tin biaha cu bo por lanta e cantidad di hende cu ta saca un voto, conforme e ley e ta parce di ta na ordo pasobra e hendenan ta registra. Pero segun e derecho di eleccion, en principio e hendenan ey no tabata tin un derecho di voto si bo wak e zuiver. Anto pa e motibo ey gobierno a purba toch di presiona pa tin un cierto forma di no administra debidamente e administracion civil. Esey ta pasa na tur e islanan caminda cu St. Eustatius tambe el a tuma luga.”
Burger Zaken bao presion
Si bo tin un claridad completo bao di cua responsabilidad esunnan cu tin cu administra e trabao di e Conseho Electoral, e ora no tin discusion. Pero segun sr. Thodé, pa motibo di e forma cu nos tin esaki structura na Aruba, e no ta asina cla. “Y p’esey bo ta haya discusion y tension entre esunnan cu ta goberna y ta di biaha den liña cu Burger Zaken, y Electorale Raad su trabao independiente di gobierno cu e tin cu haci. Anto e echo cu nan tur dos na e momento ey ta haci uzo di Burger Zaken, cual ta pone nan bao di presion. Ora cu gobierno no ta completamente di acuerdo con cos ta bay segun Electorale Raad”, sr. Thodé ta splica. Anto esey a tuma luga den e ultimo eleccion aña pasa hunto cu algun otro puntonan y temanan. Bo tin mester di un bon directiva riba e Burger Zaken, cual na Aruba nos ta hopi fortuna cu esun cu nos tin compara cu preocupacionnan cu tin na otro islanan, e ta bisa.
Sr. Thodé a guia eleccionnan na Bonaire tambe un tempo anto e ta bisa cu si e compara Bonaire, Corsou, St. Maarten, St. Eustatius y Saba, e ta haya cu toch nos ta afortuna con nos Burger Zaken akinan ta bao guia di un bon team. Pa e motibo aki por tin un bon confiansa y Conseho Electoral tabata tin un bon colaboracion cu e hendenan di Burger Zaken, cual a cumpli mas leu di loke por hasta spera di cumpli cu responsabilidadnan.
