Muchanan na Aruba ta confrontando hopi reto y nan mes a indica cu tin presion riba nan salud fisico y mental. Esey ta locual ta sali afor di e estudio Calidad di bida di Hubentud di Aruba, traha riba peticion di Ministerionan di Asuntonan Social, Husticia y Enseñansa, como continuacion di un investigacion piloto na 2019.

Un ekipo di investigadonan renombra consistiendo di Profesor Jan Hendriks di Centro Contra Criminalidad di Universidad Liber di Amsterdam (VU), Professor Asocia Annemarie Slotboom di e Departamento Penal y Criminologia di Universidad Liber di Amsterdam (VU) y Dr. Paula Kibbelaar cu a ehecuta e investigacion cualitativo. Dr. Kibbelaar ta traha na Instituto Pedagogico Arubano, IPA, y tin un experiencia amplio den investigacion na Hulanda, Merca, Corsou y Aruba.

E prome investigacion, di 2019, tabata uno piloto pero ya caba a duna un bista di e condicion di bienestar di muchanan na Aruba. Pero, mirando cu rond mundo a nota e impacto di e pandemia di COVID, a sinti e necesidad pa un investigacion mas amplio riba bienestar y salud cu ta inclui e impacto di e lockdown, pues e isolacion y tambe inseguridad economico riba muchanan na Aruba.

A entrevista unicamente alumnonan di klas 5 y 6 di casi tur scol basico (edad ta varia di 10 pa 14). No a logra entrevista alumnonan di un scol pa motibo di logistica, pero si a entrevista e dirigentenan di e scol y tambe mayornan selecta durante e sesionnan di enfoke. Alumnonan a contesta preguntanan riba cuater tema, esta scol, situacion na cas, nan bario y nan salud fisico-mental (bienestar). Tambe a entrevista e dirigentenan di tur scol, trahadonan social y tambe e asina yama IB’ers, esta e docente specialisa pa asisti cu muchanan cu mester di atencion specifico. Di cada scol basico, hasta di enseñansa special, a entrevista por lo menos dos representante, cu a haya pregunta riba e mesun cuater tema cu a trata cu e muchanan. Y adicional den e investigacion aki, a inclui tambe mayornan di diferente districto cu a duna nan participacion. “Nos logra haya cuater pa seis mayor di cada un di e seis districtonan di Aruba pa contesta nos preguntanan den sesionnan di enfoke, pa sa kico nan ta experiencia cu scolnan, na cas, den bario y e bienestar di nan yiu (nan) y amigo di nan yiunan,” Dr. Kibbelaar a duna di conoce. Kibbelaar a guia e investigacion cualitativo cu a encera e combersacionnan den e sesionnan di enfoke, mientras cu e parti cuantitativo bao encargo di Hendriks y Slotboom di VU cu asistencia di IPA, tabata den forma un encuesta digital cu e 2600 muchanan mester a contesta entre 2021 y 2023.

Balor estudio

E ta importante pa por haya un bista riba e bienestar di mucha na Aruba, pa asina por hiba un maneho mas efectivo pa atende cu e necesidad. Pa tal motibo mes e lo ta ideal pa ripiti e investigacion a base regular pa por haya un miho imagen riba e desaroyo di e generacion jong di nos isla. “Esey ta esencia di monitor, esta cu por implementa maneho cu ta basa riba datonan corecto,” e investigado a señala. “Pasobra ta a base di datonan por defini miho kico mester ta e maneho di enseñansa mes, cua curso mester pa docente por ehempel.”

E lo ta bon pa Aruba por presupuesta pa continua cu monitoreo di nos muchanan, pasobra si berdad kier un economia di conocemento, pa un crecemento sostenibel y inclusivo di Aruba unda ta pensa riba bienestar di e comunidad, “mester sa con ta cu e hobennan.” Enseñansa ta e base di un sociedad y e situacion di cas, den e contexto social-economico di Aruba ta vulnerable.

E monitor ta uno unico den sentido cu ta pa prome biaha a envolve e muchanan mes den acumulacion di dato riba calidad di bida. “E definicion principal di un desaroyo sostenibel y balansa ta pa implementa maneho cu ta cuadra cu necesidadnan actual, sin cu e tin impacto negativo pa yiunan di nos muchanan. E ta nifica como tal, cu mester por garantisa un bida decente pa tur hende.”

Ta den e luz aki cu investigadonan kier a trece na cla e calidad di bida di hobennan, den contexto di un scol sigur unda muchanan ta haya e guia cu nan mester, pa asina por sinti nan bon. Mesun cos ta conta pa e bario unda e muchanan ta biba “cu nan ta sigur, cu tin ordo, higiena, limpi, y cu tin condicionnan infrastructural pa necesario pa un bon calidad di bida.” E ta nifica por ehempel cu polis tin un presencia continuo den e bario, cu tin actividad saludable pa muchanan despues di scol. Aki, organisacionnan no-gubernamental mester haya un papel pa hunga, manera centronan di bario. Mes importante ta sosten na mayornan den educacion di nan yiunan.

“Mita di e famianan ta di un solo mayor. Mayoria ta e mama, pero tambe tin algun cu ta e tata cu ta su so. Tin hopi famia inmigrante, cu no por guia nan yiunan debidamente na scol. Tin hopi problema social economico den hogarnan na Aruba, cu ta confronta retonan financiero, cu a bira mas serio debi na e pandemia.” Tur e elementonan aki tin impacto emocional riba mayornan, cu muchanan tambe ta experiencia. “Den otro palabra, pa por traha riba bienestar di mucha, mester bin un colaboracion di cadena entre departamentonan social, di husticia y tambe enseñansa,” Dr. Kibbelaar a bisa Bon Dia Aruba.