Manera cu nos a informa caba, e derame di azeta na nos costanan ta keda un situacion di calamidad. Riba rednan social por mira varios potret circulando cu ainda tin petroli pero segun Rampenbureau, no mester mishi cu esaki a base di recomendacion y escogencia di expertonan di exterior.
Hefe suplente na Rampenbureau Rino Hermans ta bisa cu e di dos plan di maneho/accion (fuera di ayudo di boluntarionan) tabata ta pa haci e beachnan limpi cu ta wordo frecuenta, anto barancanan ta bira e siguiente fase. Den e tramite eynan, Rampenbureau ta informa cu a manda busca expertonan di exterior siman pasa pa conseho.
E expertonan aki ta di Oil Spill Response Limited for di Fort Lauderdale. E expertonan a laga sa cu e sistema cu Rampenbureau a atende cu ne tabata e unico manera cu tabata tin pa haci e. A recomenda pa no pone hende den peliger riba e barancanan y pa laga naturalesa haci su trabao. Hermans: “Petroli na final ta un producto natural e ta y nos ta bay haci mas daño na e sistema ecologico na e barancanan si bay uza kimiconan, cual ta wordo uza ora e derame tuma luga y no ora ta den fase avansa di “weathering”. Na e fase aki e ta wordo haci limpi na man.” E beachnan tabata plan number uno pa wordo haci limpi. Directie Natuur en Milieu ta controla e trabaonan y e laso di trabao entre tur e departamentonan ta tremendo den e incidente akinan, segun sr. Hermans.
Fondo & material
Sr. Hermans ta bisa nos cu cada departamento encarga cu e calamidad di derame di azeta tin nan mesun presupuesto (calamiteid verordening). Den caso di un derame e ta diferente segun sr. Hermans pasobra mester traha un rapport cu tur gastonan y dañonan pa presenta na gobierno. Cu esaki gobierno ta cuminsa cana su caminda pa entama un caso contra esun responsabel di e derame. Rampenbureau ta compila e informacion y traha e proces-verbaal.
Nos a puntra e departamento si nan no ta haya falta di material of fondo pa por trata cu e situacion aki. Mirando cu ainda por mira basta luga cu ta contamina te hasta fauna cu a cuminsa wordo afecta. Tambe tin areanan cera na Parke Arikok, caminda cu nos redaccion por a nota claramente con tin bastante petroli den e santo. Rampenbureau ta bisa cu e derame aki a wordo clasifica como un categoria Tier 1. Esaki ta nifica cu bo mesun pais of compania mester trata cu ne, segun sr. Hermans ta informa nos. “Den e caso aki DOW a haci un tremendo trabao. Nan prome inzet tabata di 350 hende pa atende cu e situacion.”
Operacion no a caba
Manera cu nos a informa caba, sr. Hermans ta enfatisa cu operacion no a caba ainda. Aworaki nos ta den fase 3 despues di un derame di azeta cual ‘tarballs’. E tarballs ta zink bao di e superficie anto ta tin “booms” pa e azeta mes pero practicamente ningun hende tin “booms” pa por trata cu e tarballs, segun sr. Hermans. E informacion cu a haya for di Los Roques di Venezuela ta cu tabata di tin shete dia di tarballs. Pa e siguiente seis siman te cu 20 di juli nan lo keda observa y haci limpi.
