(AP) — Medayista di oro Olimpico, Caitlyn Jenner a bisa ayera cu e ta sostene e orden di un oficial local di New York prohibiendo teamnan deportivo femenino cu atletanan transgenero di usa facilidadnan propiedad di e condado.
E prohibicion ta aplica na mas di 100 facilidad atletico na suburbionan di Long Island di New York City. Papiando banda di ehecutivo di condado Nassau, Bruce Blakeman na su oficina na Mineola, Jenner a bisa cu permiti atletanan transgenero manera su mes pa competi cu otro muhenan lo “caba cu deporte femenino” pa añas den futuro. “Ban par’e awo mientras nos por,” e strea di television reality, cu a sali como un muhe transgenero na 2015, a bisa.
LGBT Network, un grupo defensor basa na Long Island, a yama comentarionan di Jenner un “contradiccion desconcertante” pa su propio identidad como un muhe transgenero cu ta “no solamente hipocrita sino tambe dañino” pa comunidad LGBTQ. “Ta descurashante pa mira un persona cu a experimenta e retonan di ta marginalisa activamente contribuyendo na e opresion di otronan dentro di e mesun comunidad,” segun David Kilmnick, presidente di e grupo, a bisa den un declaracion.
Blakeman, un Republicano eligi na 2022, a emiti un orden ehecutivo na februari rekeriendo pa cualkier team, liga of organisacion solicitando un permiso di departamento di parke y recreacion di e condado “designa explicitamente” si nan ta pa atleta masculino, femenino of coed. Cualkier team desgina como “femenino” lo no haya permiso si nan permiti atletanan transgenero particioa.
E prohibicion no ta aplica na team masculino cu atleta transgenero. E ta cubri tur facilidad propiedad di condado Nassau, incluyendo cancha di bala, basketball y tennis, piscina y ice rink.
Jenner, 74, a competi contra hombernan ora el a gana e medaya di oro Olimpico den decathlon na 1976. El a bisa cu e tin “simpatia” pa hende LGBTQ y ta “compronde nan lucha,” pero a argumenta cu permiti hende transgenero pa competi contra muhe lo mina logronan cu atletanan femenino a logra bao Titulo IX, un ley prohibiendo discriminacion di sexo den programa cu ta ricibi fondonan federal.
“Tur loke mi ta purbando di haci ta protege muhenan,” Jenner a bisa dialuna.
Jenner ta hopi explicito den opone atletanan transgenero di cometi den deporte femenino. Un nativo di New York, pa largo e ta biba den area di Los Angeles.
Blakeman a argumenta cu e prohibicion tin meta pa reforsa competencia husto y protege mucha y hendenan muhe di lesion si nan hunga contra hombernan biologico. E
Long Island Roller Rebels, un liga local di roller derby di muhe, a pidi un corte na New York pa invalida e orden di e condado, bisando cu ta viola e leynan anti-discriminacion di e estado. Union di Libertadnan Civil di New York, cu a entrega e demanda den nomber di e liga, a referi na e palabranan di Jenner como “otro intento desgraciado” pa ataca y villanisa muhe y muchanan transgenero. Fiscal Letitia James, un Democrata, a bisa cu e orden di Blakeman ta “transfobico y discriminatorio” y ta viola leynan estatal.
Blakeman a entrega su propio demanda pidiendo un corte federal na New York pa afirma cu e orden ta legal.
