Despues di un aumento constante tur luna riba cantidad di bishitantenan cu ta bin Aruba, luna di mei ultimo e volumen di turista a cay. Esaki tin di haber cu e situacion interno cu e pais bisiña ta pasando aden y cu ta afecta nos turismo, ya cu Venezuela ta nos di dos mercado principal di nos industria turistico.
Luna di april a raporta un aumento di turista entre un 3% pa 4%, pero luna di mei si el a bay atras. Aunke ainda Aruba Tourism Authority (ATA), no tin disponibel e ultimo rapport di mei cu lo bin cla e siman aki, directora di e oficina aki, sra. Ronella Tjin Asjoe-Croes a declara na Bon Dia Aruba, cu pa luna di mei nan ta mira un bahada di cantidad di turista.
Mercado di Venezuela
El a bisa cu den luna pasa a wordo refleha e impacto di Venezuela. Un mercado cu a haya basta atencion di ATA siman pasa, organisando diferente seccion cu e gremio di turismo. Pero tambe nan a invita Banco Central, ATIA y diferente otro organisacion, caminda nan a trece pa di dos biaha un orador di Venezuela. Nan a haya un splicacion riba e realidad socio politico masha compleho cu Venezuela ta pasando aden.
Di e forma aki e representantenan di tur gremio local lo por un bista di kico ta pasando den e mercado importante aki pa nos turismo, y asina nos por proyecta pa prepara nos mes. E situacion aki tabata previsibel y e directora di ATA ta haya cu na tur momento nos mester ta prepara pa e impacto di Venezuela por trece cun’e. Pero e ta haya cu ta dificil si pa midi e momento di ki ora cambio ta bin.
“Cambionan cu ta netamente relata na e situacion politico, economico eynan, y cu tin su impacto riba Aruba”, e halto ehecutivo di turismo a declara na e matutino aki.
No mas raspa carchi
El a agrega cu e prome luna nos por observa caba e impacto di basicamente cu e turista yama popularmente “raspa cupo” cu a mengua y cu no ta bin mas.
Nan a haya otro tipo di manera di sostene nan mes den mercado y tambe gobierno a tuma paso haciendo no atractivo pa nan bin raspa carchi na Aruba. Tur esaki a wordo refleha y tabatin su impacto den e volumen di turista cu a baha na luna di mei.
“Nos mester ta consciente cu esaki ta un aspecto cu te aworaki nos por sigui wak’e pa resto di e aña aki”, asina directora di ATA a bisa. E echo aki ta trece un impacto formal riba e resultado completo di e cantidad di turista cu nos isla ta ricibi luna pa luna.
Di otro banda, directora di ATA a laga sa cu Merca a mustra un crecemento leve na luna di mei compara cu aña pasa. Otro mercado di nos turismo algun di nan a mustra subida y otro bahada. Pero e impacto mas grandi considerando e volumen di bishitante cu nos ta ricibi di nan ta esun di Venezuela.
Sra. Tjin Asjoe-Croes ta enfatisa cu specificamente e segmento di bishitante Venezolano cu tabata bin Aruba pa raspa carchi ta esun cu a cay, ya cu nan no ta bin mas. E tabata un turista cu nos kier of no, nan presencia tabata conta den e volumen y cifranan, y nan no por elimina nan.
“Nos ta traha segun formulanan di raporta cifranan conforme Organisacion Mundial di Turismo. Claro no ta importa cu segmento ta hinca den bo total, pero semper nos mester ta consciente cu esaki lo pasa un dia, y e lo yega un punto final”, asina directora di ATA a declara.
