(lapatilla.com) – Ta calcula cu e aña aki e sector turistico lo a cay cu 50% como promedio, como consecuencia di factornan manera e perdida di conectividad aereo, e caida di e poder di compra di e Venezolanonan, e deterioro di e careteranan y e insiguridad en general.
Asina Jesús Irausquin, presidente di e Conseho di Turismo (Conseturismo), a expresa y a precisa cu e balance anual di e sector ta mustra hopi incidente pa falta di conectividad y e perdida di frecuencia aereo, producto di e terminacion di operacion na e pais di mas di dies aerolinea.
‘‘Nos tin e tarifanan aereo regula, y mientras nos tin e obstaculo ey, e aerolineanan ta sigui perde placa. Pa cada vuelo cu ta haci na e pais e empresanan ta perde como 10 miyon bolivar”, el a aclara.
Referiendo na e conectividad via tera cu ta afecta pa insiguridad y deterioro di e infrastructura di caminda el a declara cu e elementonan ey no ta haci acceso facil. Ademas den e caso di e Venezolanonan e ta bira mas complica ainda, pa e situacion economico precario cu ta haci cu nan prioridadnan ta cuminda, medicamento y scol.
“E situacion aki a genera un implosion den e sistema turistico nacional y e nivel di actividad a keda afecta pasobra turismo no ta un prioridad sino algo pa esun cu por,” Irausquin a comenta.
No obstante, ta proyecta cu pa fin di aña por registra un ocupacion hotelero di 80% loke lo mehora e turismo interno, como consecuencia di cu hopi Venezolano no lo sali di e pais pa motibo di e poco disponibilidad di vuelo y e costo halto di ticket aereo.
Irausquin a sigura cu e nivel di ocupacion referi ta hopi bon tumando na cuenta cu e sector hotelero tabata move entre 55 y 63% di e ocupacion anual, loke no ta garantisa e sostenibilidad di e empresanan.
Segun Irausquin ta necesario diseña politica orienta riba promove e bishita di turista di exterior pasobra e prijsnan ta sumamente beneficioso pa e bishitante. Sinembargo, pa logra esaki mester por ofrece siguridad y bon servicio publico.
