Presidente di Camara di Comercio (KvK), Ernst Mohamed ta haya cu e caida di e confiansa di e consumidor ta djis un “moment opname” riba economia.
E indice di consumidor a baha cu 1.9 punto te 94.6 0 segun Banco Central di Aruba, locual ta refleha segun sr. Mohamed cu actualmente nos ta den un temporada di campaña caminda inversionistanan ta wanta te despues di eleccion pa wak kico ta bay pasa. Tur esaki ta factornan di momento, pero no uno indicativo y precies riba e comportacion di e consumido.
Impacto aumento salario
Un 70% di trahadonan na Aruba ta gana un salario minimo. Mientras cu e aumento di salario minimo decreta pa gobierno sin consulta cu e gremio di comercio y dunado di trabou lo tin su impacto, te hasta pa e mesun trahadonan, segun presidente di KvK. “Mayoria di comerciante ta haya mas facil gewoon di manda hende cas, pasobra ya e ora bo tin un rason pakico di manda e hende cas”, el a bisa.
Otro situacion cu e tipo di decision aki cu ta pone mas presion riba comercio su gastonan lo ta e ceramento di mas negoshi. Ya cu dado momento e gastonan cu e comerciante tin cu paga no ta bale la pena pa bo opera un negoshi mas. Esaki ta wordo refleha riba tanto negoshi cu a cera caba y tin negoshinan cu ta sobreviviendo y por ta e medida aki cu gobierno a impone lo bira su ultimo rosea. Nan ta ripara cu Wema ta bay cera un di su filialnan, sr. Mohamed laga sa. P’esey e ta considera importante cu gobierno prome cu a bin cu un decision asina mester por a midi e impacto cu esaki lo por tin riba economia, comercio y despues riba pueblo.
