Bida despues di refineria?

Manera tabata di spera, e reaccion riba e anuncio di Citgo cu nan ta slow down e proyecto di rehabilitacion tabatin un efecto publicitario enorme. Di palabra di lamento y sorpresa, te na reaccion di told you so. Den tur e opinionnan scucha, ta importante di paga bon atencion na loke gobierno mes ta bisa. Esaki pasobra nan ta esunnan cu lo mester tuma e proximo pasonan den e asunto. Cu nan tin un comision ta analisando e famoso 2000 pagina di e convenio cu Citgo/PDVSA ta di comprende; nos lo tende di esey na su debido tempo. Pero esey no ta implica cu nos no sa nada di kico ta e scenarionan mas probabel. Esaki pasobra den e tratamento di e asunto den parlamento, unda gobierno a duna solamente un minimo di informacion, toch nos por a conta cu e conseho di Conseho Consultativo (Raad van Advies) cu si a haya e 2000 paginanan pa studia. Algun elemento for di nan conseho.

Ken ta debe ken ora cu sea e compania, o e partnernan Arubano no por cumpli mas cu su obligacionnan? Den e caso aki ta irelevante e posibilidad cu Aruba, gobierno y/o Refineria di Aruba NV, no cumpli cu e convenio. Loke tin aki ta e caso cu probablemente Citgo (Citgo Aruba Refining NV, Citgo Aruba Terminal NV y Citgo Aruba Holding LLC) no lo cumpli cu e convenio y no ta finalisa e rehabilitacion y no ta start e operacion, dentro di e periodo stipula pa esaki. Si nos no ta kiboca tin un termino di cuatro aña pa nan cumpli. En todo caso no por papia di  sin cumplimento ainda na e momento aki. Pero den caso cu e asunto yega asina leu, cu sea nan mes ta tira e serbete, o na final di e periodo ainda nan no a cumpli, tin un garantia di e compania madre directo, PDV Holding Inc. estableci na Merca y cu ta 100% propiedad di PDVSA, cu den caso di  sin cumplimento di e grupo di Citgo,  cu ta subsidiario di PDV Holding, di US$ 150 miyon.

Pa loke ta e asunto di desmantela e instalacionnan despues cu e convenio vence, despues di su termino normal, di 15 o 25 aña, esaki ta 50% pa Aruba, y 50% pa Citgo. Den caso cu Citgo bandona e proyecto prome cu tempo, e compania(nan) ta responsabel pa desmantelacion completo… Naturalmente e ultimo aki ta zona bunita, pero nos no sa den ki situacion e companianan ta pa e tempo ey y con e situacion na Venezuela lo ta. En todo caso e holdingnan di e dos companianan local di Citgo – Citgo Aruba Holding LLC y PDV Holding Inc. – ta compania Mericano cu tin mas problema si nan no cumpli cu ley, cu e aventureronan comunista cu ta dirigi PDVSA y gobierno di Venezuela. E companianan propiedad di PDVSA actualmente no por pasa placa pa PDVSA, asina ta cu probablemente nan por tin placa pa paga daño y perhuicio na Aruba, si yega asina leu. Tuma nota cu nos no ta papiando aki di e caso di limpiesa di e daño ocasiona prome cu Citgo a drenta den e wega;esey ta otro presupuesto hopi mas grandi y ademas desconoci cu Aruba a tuma over di Valero.

Pero awor, cu kico nos ta keda si e scenario aki bira realidad, y no bin otro operador di e refineria? Nos a comprende di nos prome ministro cu e no ta pro un siguiente candidato, pero lo ta desea di intercambia idea cu comunidad kico lo mester bay substitui e refineria. Nos ta contento di tende esey y ta oportuno anto pa cuminsa elabora riba alternativa, pa ta prepara pa dia prome ministro lo kier dialogo riba e tema. No ta e idea cu aki di inmediato nos desaroya un plan completo, pero algun idea pa indica direccion. E prome ta pa no cuminsa pensa mesora tocante e refineria, o e tereno, pero acerca e asunto for di e perspectiva di un desaroyo sano socioeconomico y urbanistico di San Nicolas. Ta imaginabel cu e terminal di transshipment lo keda, den e caso ey e parti mas pabao di e tereno lo no cambia di caracter. E parti central, na haltura di centro di San Nicolas ta duna e posibilidad di desocupa esaki y crea un acceso pa lama, cu e luga aki a perde casi 100 aña pasa. Esaki ta crea un bida totalmente nobo pa e centro di San Nicolas, cu un waterfront y cu perspectiva pa inverti den renobacion di e centro comercial antiguo, cu su balor historico/cultural.

Sinembargo, mester tene cuenta cu desaroyo comercial no ta algo cu ta surgi di mes, esey nos a ripara den e ultimo añanan cu practicamente nada a sucede den sentido di reestablecemento di comercio pa logra un nivel aceptabel di servicio na San Nicolas. Un di e motibonan ta cu hasta e poder di compra local, di San Nicolas mes, no ta shop ey. Prome cu core haci algo pa haci, un bon analisis, cu no mester dura masha largo, y no mester di experto di exterior cu ta costa un miyon, ta necesario.