E cifranan di Camara di Comercio pa prome mita di aña ta confirma rumbo negativo di economia. Registracion di negoshi a cay cu 10% compara cu e mesun periodo di 2015. Mientras cu na 2015 tampoco economia tabata creciendo fuerte, asina mes por a registra bastante mas empresa nobo cu a bay purba nan suerte. Cu e situacion economico no mehorando den e aña aki, registracion a cay di 680 negoshi registra na 2015 den seis luna, te na 610 e aña aki.
E imagen presenta ta cuadra cu diferente otro indicador cu ta uza pa completa un bista riba con economia ta bayendo. Asina Banco Central a caba di publica dos encuesta periodico, uno ta trata di e expectativa di consumidor, otro ta trata di expectativa di empresario di con economia ta andando y kico ta spera pa futuro inmediato. Ambos a sali negativo cu un score bao di 100 (riba 100 ta positivo y bao di 100 ta negativo). Tambe tin e cifranan di entrada di gobierno cu ta aparece den e ‘kwartaalrappportage’ number 1 y 2 di e aña aki. Impuesto di importacion a mehora un poco den di dos trimester di aña, pero asina mes den prome mita di aña esaki a keda na solamente 38,1% di loke ta spera pa henter aña. Segun e ministerio mes, cobransa a mehora danki na mas eficiencia di e servicio duanero, pero ta señala tambe cu e volumen di mercancia tabata menos di loke a spera. Accijns riba cerbes a disminui, mientras esun riba tabaco y bebida sterki a mantene nivel, igualmente accijns riba combustibel.
E situacion di BBO ta bisa hopi di e actual nivel di actividad economico. BBO a cay cu 3,7% den e periodo referi, compara cu aña pasa. Logicamente esaki tambe tin consecuencia pa cobransa di BAZV cu ta tuma luga simultaneamente via Servicio di Impuesto. Igual e primanan di AZV y SVb cu tambe ta mustra tendencia negativo. Recientemente ministro encarga cu Salubridad Publico a referi na e resultadonan decepcionante di entrada di prima y BAZV, loke a conduci na e problemanan di cashflow na AZV y Hospital. Loonbelasting a aumenta levemente cu 1,5% y segun e reportahe mes esaki tabata debi mas na aumento di eficiencia y control mas intensivo.
E pregunta ta si e crecemento modesto den turismo for di Merca ta suficiente pa compensa e caida den actividad local. E cifranan di impuesto riba camber no ta disponibel, ya cu esaki ta bay directamente pa Aruba Tourism Authority (ATA). Si tin e impuesto ambiental riba camber y vehiculo di huur den e cifranan presenta pa gobierno. Impuesto ambiental riba camber a subi cu casi 5%, loke ta un cifra positivo,mientras cu impuesto riba vehiculo di huur a baha cu 0,4% den mesun periodo.
ATA no a duna cifra
Interesante ta cu segun e obligacion di raporta na CAFT tocante e ‘sector colectivo’, gobierno mester duna cuenta di estado financiero di e entidadnan liga na gobernacion, incluyendo ATA. Ta resulta cu den e reportahe tin cifra di AZV, SVb, Universidad di Aruba y Serlimar, pero no di ATA. No a comenta den e rapport e motibo pakico ATA no a cumpli cu duna cifra di nan finanzas den prome mita di aña. Ta di spera cu den e proximo rapport e informacion aki ta disponibel, ya cu no mester lubida cu ley (di CAFT) ta dicta cu mester duna e organismo aki tur informacion cu nan ta considera necesario pa haci nan trabao. Asina recientemente gobierno di Reino a ‘urgi’ gobierno di Aruba pa corda duna CAFT tur documento encuanto e deal cu Citgo, cu aparentemente apesar di nan ‘peticion cordial’ nan no a logra haya. Manera nos a yega di señala caba, CAFT tin e autorisacion legal di bin busca informacion, si mester cu ayudo di polis, si nan no ta haya cooperacion debido. Nos ta supone cu cos no mester yega asina leu.
Pa loke ta crecemento economico pa e aña aki, e comentarionan di den economia ta keda mustra un pesimismo pa un cambio pa miho e aña aki ainda. Esey ta relaciona entre otro cu e tardansa cu tin den finalisa asunto cu Valero pa cu e traspaso di e refineria y inicio di e trabaonan di rehabilitacion. Sin esaki practicamente no lo por papia di crecemento economico e aña aki. Mientras tanto, no a bin claridad ainda tocante e pregunta si esnan cu mester inverti den e refineria tin e capital necesario sigura. Manera conoci, Citgo Petroleum Company na Houston lo participa den e rehabilitacion cu asistencia tecnico so, pero no cu financiamento cu lo mester bin di pafo.
Esaki ta pone e asunto den scochi di e companianan lanta na Aruba y e holding crea riba nan na Merca, Citgo Aruba Holding LLC. Te awor esaki no tin propiedad conoci cu por sirbi di ‘collateral’ pa e 600 miyon dollar, necesario pa prepara e transicion pa un ‘upgrader’ di crudo. Ni PDVSA, ni PDV Holding, cu ta compania madre di Citgo Aruba Holding, no ta parce capaz di fia suma grandi na e momento aki.
