Simplemente Gobierno no kier implementa ni su propio plan pa reduci gasto di personal y sin adaptacion di exigencia pa reduci e gastonan den presupuesto 2022, nunca lo yega na e obhetivo acorda den e landspakket, esta cu e gasto di personal di Pais Aruba mester ta na 10 porciento di nos GDP (Producto Interno Bruto). Asina lider di Accion21 Miguel Mansur a bisa Bon Dia Aruba.

Henter e discusion riba e plan di Gobierno pa reduci gasto di personal, BVP practicamente a lanta cabez awor. Un plan cu ta data di 2018 pero cu ta apenas na Juli di e aña aki a bay Parlamento. CAft a inclui e BVP como un instrumento pa baha e gastonan di personal di Pais Aruba. Y segun sr. Mansur, contrario na locual hopi hende ta pensa, e 10 porciento cu ta e norma, ta inclui tambe salario di personal di entidadnan semi publico, manera e companianan di utilidad.

Na e momentonan aki, e gasto di personal di sector publico ta 11.7 porciento y mester yega na 10 porciento na 2027. Y si conta e salario di sector publico y semi publico, esaki ta na 12.5 porciento di GDP cu ta nifica cu e reduccion ta mas skerpi ainda. “Pero si e reduccion no ta refleha den presupuesto 2022, manera ma bisa Director di Finanzas durante un reunion, ta con ta pensa di yega na e 10 porciento na 2027,” Mansur a bisa Bon Dia Aruba.

BVP

Un grupo di trabou di Departamento di Recurso Humano DHR, e Ministerio pa Asuntonan General y Minister di Finanzas y Economia a bini na 2018 hunto riba instruccion di Gobierno, pa duna bista riba e costo di personal publico y percura cu e gastonan bira controlabel, y con pa baha e gastonan aki structuralmente. A traha un plan di maneho strategico cu 30 instrumento a termino corto, medio plazo y plazo largo, cu e intencion pa concretisa y cuantifica e otro instrumentonan di maneho pa baha gasto y traha conhuntamenteo pa baha y controla gasto di personal.

E Memorandum Financiero Economico 2018-2021 di Gabinete Evelyn Wever Croes ta papia di reduccion di gasto di personal di 3 miyon florin pa aña.

E intencion ta pa kibra e tendencia di crecemento di gasto di personal y yega na un nivel optimo, unda e costonan ta hustifica e calidad di servicio.

 

Y aunke cu e cantidad di personal a baha compara cu 2009, di 5099 pa 5011 na 2018, e gasto di salario y otro costo si a sigui aumenta ( ta exclui docentenan di DPS for di e totalidad mirando e scarsedad di maestro). A nota cu e gasto di personal, desde 2009 a subi cu un average di 10 miyon florin pa aña.

A identifica siete obhetivo, cu pa medio di e 30 instrumento di control lo por baha e gasto di personal, pero prome cu yega na esey, mester analisa pakico tin aumento di gasto.

E componentenan di costo cu ta forma e gasto total ta e salario di personal y contribucion di Pais Aruba como dunado di trabou. E salario y toelage ta yega na 66.7 porciento di e gasto total. E contribucion na APFA ta 10.3 porciento, toeslag AOV/AWW ta 6.3 porciento, AZV ta pisa riba gasto di personal cu 5.9 porciento, vakantieuitkering ta 5.1 porciento, y overtime ta 4.7 porciento. E otro gastonan ta crece den average bou 1 porciento di e gasto total.

Mecanismo di reduccion y control

E siete mecanismo di control ta : limita nombracion nobo; no renoba contractonan laboral; elimina automatismo den e periodieken y promocion; baha gasto di overtime; introduci areglo di VUT; no reemplaza esnan cu baha cu pensioen; y laga hende sali di servicio pa otro motibo.

Durante e ultimo reunion den Parlamento, drs. Marisol Lopez Tromp di MAS a puntra Gobierno si a aplica e mecanismonan aki. Prome Minister Evelyn Wever Croes a bisa cu por ehempel e nombra di 132 hende nobo ta basa riba necesidad di departamentonan y tur tin di haber cu siguridad y e contractnan laboral pa e Family Justice Center ta pa cumpli cu e trabounan di Sociaal Crisis Plan. Sinembargo, na e mesun reunion, e Prome Mandatario di Aruba a bisa cu Gobierno no ta bay usa e BVP cu e mes a laga traha mas, sino cu ta bay usa e norma di 10 porciento di GDP. Con ta bay yega na e 10 porciento, e no a splica.

Problema ta cu segun Miguel Mansur ta cu Prome Minister Evelyn Wever Croes a bisa cu no ta bay kita ningun hende di sector publico y e nombracion di 132 hende nobo, pa un suma di 8 miyon florin na salario, ni con esencial nan ta, ta bay contra e mesun maneho aki. “E ta bay contra e palabracion haci cu mester yega na 10 porciento di e GDP pa 2027.”

Den concepto di Mansur, si berdad e 132 vacaturanan nobo aki ta asina esencial, mester a haci otro ehercicio pa baha gasto di personal pa hustifica e gasto aki, pasobra e imagen cu ta presenta na sindicatonan na Aruba y tambe na Hulanda ta uno robes. Ademas cu Aruba lo no tin e placa pa paga tur e salarionan si no cumpli cu palabracion. “Pasobra lo no haya sosten di likides pa cumpli cu e gastonan.”

Opinion CAft

CAft a bisa Bon Dia Aruba cu e colegio ta enfatisa cu den liña cu su otro consehonan, Gobierno mester mira e importancia pa tuma medidanan structural pa laga e gastonan di personal baha y yega na un nivel manehabel pa asina por realisa un deficit mas abou den e proximo añanan y cu debe di Pais Aruba no sigui aumenta.

Como tal, e ta necesario pa yega na un finanzas publico sostenibel y un aparato publico efeiciente. E BVP, esta e plan cu Gobierno mes a laga traha pa baha gasto di personal di Pais Aruba, apesar di su intencion, no a produci recortenan bisto. Pero esaki pa motibo cu segun CAft, no ta cla si a sigui e medidanan proponi den e propio plan. CAft ta pidi enfaticamente atencion pa ehecucion di e medidanan, of e siete obhetivonan di e BVP menciona ariba.

Es mas, e landspakket ta menciona e BVP como herment pa baha e gasto di salario di sector publico y semi publico na 10 porciento di GDP pa 2027.

Bon Dia Aruba lo amplia den su edicion di mayan riba e combersacion amplio cu a tene cu sr. Mansur kende ta bisa cu banda di e problemanan grandi cu tin caba riba tereno financiero, y e posibilidad real cu e pandemia lo bolbe afecta turismo di Aruba pa motibo di Omicron, falta di incumplimento cu palabracionnan den e landspakket, cu ta inclui e falta di aplica e BVP, lo crea un problema mas grandi ainda pa Aruba.