Como un ‘empuhe’ pa por sigui cu e trabou cu gobierno ta bin ta realisando riba tereno di finanzas publico, prome minister Evelyn Wever-Croes a cualifica e hecho cu CAft pa prome biaha a duna un ‘elogio’ pa nan esfuerso.

“Cada cos chikito ta conta”, el a bisa. Y di biaha e prome mandatario a pronostica cu 2020 lo bira un aña cu mas trankilidad financiero, pa asina gobierno por haya mas oportunidad pa por goberna.

El a bisa cu loke e colegio di supervision financiero a trece cerca prensa, ta loke nan mes como gobierno a tende for di CAft, siman pasa. Y aunke presidente di CAft, sr. Raymond Gradus, tabata cauteloso pa duna e elogio aki, pero el a mira –segun e prome mandatario– cu pa 2019 gobierno por a cumpli cu locual nan a palabra den e protocol cu Hulanda.

Un punto cu premier Wever-Croes a considera como un ‘bon noticia’ ta cu e cifranan final di e ultimo kwartaal di 2019 ta mustra cu en bes di un deficit di 25 miyon florin, cu ya caba nan a premira cu lo bira alrededor di 4 miyon, finalmente a resulta di ta un surplus caba di 1 miyon florin.

E ta haya cu e resultado aki ta un prueba mas cu e maneho financiero ‘duro, estricto y dificil’, ta dunando su frutonan. “Esaki ta un motibo pa CAft mira cu nos ta serio den esaki,” el a declara.

Independisacion di servicio.
Sinembargo pa loke ta e presupuesto 2020 cu ainda no a wordo trata den parlamento, CAft a trece su preocupacion riba bahamento di gasto structural riba subsidio, siguridad social (plan di bijstand) y reduccion di aparato gubernamental.

El a splica cu e recomendacion di CAft ta pa reduci e departamentonan di gobierno, y purba di uni un cu otro. Pa aña 2020, gobierno ta considerando e recomendacion aki di CAft, y ya caba nan tin un lista di departamentonan, entre nan esun di Controladonan di Casino.

Pero otro aspecto tin di haci cu e dunamento di servicio publico cu eventualmente algun di nan ta wordo privatisa. “Servicionan cu un gobierno no mester haci su mes…,” el a bisa. Sino cu eventualmente gobierno ta laga otro brinda e servicio aki. Nan ta trahando riba e independisacion di servicionan di gobierno.

Ya caba e colegio di supervision financiero a bin cu algun recomendacion tambe pa presupuesto 2021. Un preocupacion di CAft tin di haci cu e fondonan di AZV y SVb relaciona cu behecemento di nos poblacion. Aunke e ta un bon noticia cu nos promedio di bida ta mas largo, toch e tin su efecto riba cuido di salud y e fondo di pension di behes. CAft a cuminsa duna algun recomendacion con pa cuminsa atende cu e aspectonan aki.

Prome minister a bisa cu gobierno ta comparti e preocupacion di CAft completamente. Ya cu pa aña 2020 no solamente nan mester bay pa un surplus di 25 miyon florin. Ademas gobierno tin extra interes pa paga di 50 miyon, compara cu aña pasa. Igualmente extra proyectonan PPP pa paga di 18 miyon. Tambe un deficit adicional di seguro medico general (AZV) di 12 miyon florin, y algun gastonan adicional acerca cu e mandatario no specifica. El a argumenta cu e peso financiero aki a haci cu gobierno a tarda pa trata e presupuesto aki den parlamento.