Gobierno di Reino a discuti efecto guera na Ucraina pa nos region
Aruba a ricibi 12 miyon florin di sosten di likides. Esaki ta e suma cu College Aruba financieel toezicht, CAft a recomenda na Conseho di Minister di Reino pa yuda presupuesto di Aruba pa 2022 cune. E suma aki ta pa e prome kwartaal di e aña aki, y ta e 8 tranche di sosten di likides.
Ayera Conseho di Minister di Reino a reuni pa determina si Aruba por ricibi e fondonan y e biaha aki si, despues cu a wanta cu e decision pa tres luna, a bay de acuerdo cu e sosten. Corsou y St. Maarten no a ricibi sosten ya cu CFT a considera cu no tabatin necesidad.
Manera ta conoci, Aruba desde 2020 ta ricibi sosten di likides for di Hulanda, bao condicion cu ta ehecuta e landspakket pa Aruba cu ta nifica reforma grandi y tambe cu ta acepta supervision riba cumplimento. Ta evalua e necesidad di likides cada kwartaal, pero tambe e progreso riba ehecucion di e landspakket. Los di CAft, COHO, esta e Caribisch Orgaan voor Hervorming en Ontwikkeling ta duna conseho pa sosten basa riba cumplimento cu e landspakket, y segun e reportahe di ehecucion. Segun COHO i.o (in oprichting), ehecucion di e landspakket den e ultimo tres lunanan a bay generalmente bon y den un colaboracion constructivo entre Aruba y e organo.
Conseho di Minister di Reino a trata diferente tema, entre otro tratadonan cu Corsou y St. Maarten kier sea, ademas e participacion di Hulanda na e reunion di G-20 cu ta tuma luga na Indonesia y nombramente di drs. B. Tazelaar kende ta bira Embahador di Reino na Merca y tambe pa Bahamas. Drs. Tazelaar lo asumi e posicion na 2023.
Pero locual tambe a discuti ta e consecuencianan di e Guera na Ucrania pa e area Caribense di Reino. Den e relato di Conseho di Minister di Reino no a elabora riba e conclusionnan.
