CAft tin diferente rapport?

Conclusion ta otro di locual gobierno ta pretende!

Conclusion completamente contrario nos ta haya di tende di banda di gobierno y di banda di CAft a base di e rapport financiero di gobierno tocante e di dos trimester di aña, y e reaccion di CAft riba esaki. Loke Caft a duna como su opinion, nos tur por lesa riba nan website y pa mayor conveniencia, nos a traduci den e edicion aki e parti inicial y principal di esaki. Gobierno por bisa loke e kier sin cu por controla, pasobra nan no ta publica e rapport cu pa ley mester duna CAft y parlamento. Y si bo mester pa ley cumpli cu e ultimo obligacion aki, pone anto di biaha riba un website pa tur hende por lesa y saca nan propio conclusion. E palabra magico yama transparencia y a pesar cu awendia tur e hendenan aki tin cada un, un of mas titulo academico, aparentemente nan no ta comprende. Pero ban bolbe na CAft y kico e tin di bisa tocante nos situacion financiero como pais.

Na luga di parti compliment, manera gobierno ta pretende, CAft ta cuminsa cu expresa su preocupacion si gobierno ta bay logra yega na un deficit cu ta keda bao di e norma estableci den ley di 0,5%, compara cu GDP. E preocupacion ta cu e entradanan ta kedando atras compara cu e pronostico segun presupuesto 2017. Manera conoci, aumento di entrada ta basa riba inversion den e refineria e aña aki, acompaña pa empleo pa hopi hende, cu ta trece hopi impuesto, principalmente loonbelasting y BBO, den caha di gobierno. Nos ta na inicio di luna nuebe di aña y nos mes por a tende y mira cu e inversion grandi anticipa pa inicia na juli ultimo, simplemente no tey. Ni e mancamp pa acomoda tur e trahadonan di exterior no ta keda cla e aña aki. Y esey ta si situacion na Venezuela no cambia e panorama. Esaki tin consecuencia grandi. Por ehemplo, BBO lo a crece e aña aki di Afl. 94 miyon na 2016, te Afl. 124 miyon. A pesar di un aumento basa riba miho cobransa, e total pa fin di aña lo por yega Afl. 100 miyon, pero no e suma poni den presupuesto. Igualmente loonbelasting cu lo ta un poco mas halto cu na 2016, pero no e cifranan exagera cu a hinca den presupuesto.

Cu un crecemento di GDP nominal di 2,1% den e caso cu e inversionnan den e refineria na 2017 di berdad tuma luga, esaki lo yega segun calculacion di Banco Central na Afl. 4876 miyon. Deficit di gobierno por lo tanto lo ta den careda di Afl. 24 miyon y ta fia e suma aki, riba e cantidad di mas di Afl. 400 miyon cu ta fiando caba pa paga debe riba bono cu ta madura e aña aki. Si na mita di aña gobierno tin caba un deficit riba su operacion (exploitatierekening) di Afl. 95 miyon, ta bira dificil con pa fin di aña drecha e panorama aki. E problema ta entre otro e compensacion cu gobierno ta pensa di haya riba e kapitaalrekening cu ta depende grandemente di e benta di e compania cu ta importa y distribui combustibel na Aruba. Manera comenta anteriormente, gobierno a pone pa Afl. 40 miyon den presupuesto pa bende, pero a gusta e idea di keda cu ne. Logica simpel ta bisa bo cu bo no por bende algo y keda cu ne pareu. Anto riba e deficit actual ta aparece e cuarenta miyon florin extra aki, si di berdad pa fin di aña no a bende esaki ainda.

Kico lo bay pasa awor, specialmente den tempo di campaña, cu tur su gastonan extra pa gobierno? Cu gobierno lo bay sigui e rumbo cu e kier sigui, contando cu no tin resistencia fuerte for di Den Haag, unda gobierno demisionario ta sinta ta warda e gobierno nobo bin aden. Casi sigur e amigonan di CDA lo ta forma parti di e gobierno nobo, loke ta bon noticia pa e partido berde. Ta bao presion di CDA tambe cu a habri man laga bay entre 2009 y 2012, dunando gobierno di AVP oportunidad pa e desastre financiero cu tabata cuminsa mustra caba, na momento cu e gabinete VVD/PvdA a tuma rienda di gobierno na Hulanda. Si partido AVP bolbe su so den gobierno, nan lo intenta yega na un areglo mas flexibel cu gobierno Hulandes, specificamente pa termina e ley bao di cual CAft ta opera. Na su luga lo introduci nan Begrotingskamer cu segun nan pensamento lo ta nada mas cu otro organo di conseho, cu cual nan ta haci manera semper nan ta haci cu tur conseho: pone nan un banda y dal bay.

Si en cambio e partido no bolbe den gobierno, anto henter e situacion financiero manera cu e ta na e momento ey, di repente no ta nan problema mas. Esun cu sinta como gobierno nobo lo mester bay lidia cu loke nan ta laga atras. Y e daño por ta grandi. Oficialmente tin un stop riba compromiso financiero… a menos cu e ministro encarga duna su aprobacion. Cuanto di e gastonan di campaña ta keda pa nos paga, atrobe?